Rusia dhe Kina bllokojnë rezolutën për Ngushticën e Hormuzit në OKB
E Martë 7 Prill 2026, 20:08
Dritare.net
Rusia dhe Kina kanë vënë veton ndaj një projektrezolute në Këshillin e Sigurimit të OKB-së, e cila synonte të forconte sigurinë në Ngushticën e Hormuzit, një nga rrugët më të rëndësishme detare për transportin botëror të naftës.
Projektrezoluta, e propozuar nga vendet e Gjirit, u mbështet nga 11 shtete anëtare, ndërsa Pakistani dhe Kolumbia abstenuan. Megjithatë, vetoja e Rusisë dhe Kinës bëri që ajo të mos miratohej.
Pas disa javësh negociatash, teksti i saj u zbut ndjeshëm. Fillimisht, drafti përfshinte masa sipas Kapitullit VII të Kartës së OKB-së, që mund të autorizonin përdorimin e forcës ushtarake. Më pas, formulimi u ndryshua duke hequr këtë pjesë dhe duke u kufizuar në inkurajimin e shteteve për të ndërmarrë masa mbrojtëse të koordinuara për garantimin e sigurisë në këtë zonë strategjike.
Gjatë mbledhjes, ministri i Jashtëm i Bahreinit, Abdullatif bin Rashid Al Zayani, deklaroi se projektrezoluta nuk synonte të krijonte një realitet të ri, por përbënte një përgjigje serioze ndaj asaj që ai e cilësoi si sjellje armiqësore të përsëritura nga Irani. Ai paralajmëroi se mungesa e reagimit nga Këshilli i Sigurimit mund të ketë pasoja të rënda globale dhe të krijojë precedent për bllokimin e rrugëve të tjera të rëndësishme detare.
Ngushtica e Hormuzit mbetet një pikë kyçe për furnizimin botëror me energji. Sipas raportimeve, disa vende, përfshirë Kinën, kanë arritur të vazhdojnë përdorimin e saj, ndërsa Rusia mund të përfitojë nga situata në rast të lehtësimit të sanksioneve ndaj naftës./K.C/dritare.net
