Po sikur SHBA të mos veprojë? Zelensky vë në dyshim mbrojtjen e Evropës
E Enjte 22 Janar 2026, 16:04
Dritare.net
Presidenti i Ukrainës, Volodymyr Zelensky, deklaroi sot në Forumin Ekonomik Botëror në Davos se Evropa është tepër e varur nga Shtetet e Bashkuara për sigurinë e saj dhe nuk është e përgatitur të mbrojë veten në mënyrë të pavarur.
Në fjalimin e tij, Zelensky theksoi se Evropa ka nevojë për forca të armatosura të bashkuara që të jenë realisht në gjendje të mbrojnë kontinentin. Ai vuri në pikëpyetje reagimin e NATO-s nëse Rusia do të sulmonte një vend tjetër evropian, si Lituania apo Polonia.
“Evropa mbështetet vetëm te besimi se, nëse rreziku vjen, NATO do të veprojë. Por askush nuk e ka parë realisht aleancën në veprim,” tha Zelensky, duke shtuar se NATO ekziston sot kryesisht falë bindjes se SHBA do të ndërhyjë.
Sipas tij, kjo pasiguri është e pranishme në mendjen e çdo lideri evropian. Ai e përshkroi Evropën si një “mozaik të bukur, por të fragmentuar” fuqish të vogla dhe të mesme, që duket e humbur dhe e paaftë të marrë drejtimin në mbrojtjen e lirisë globale, veçanërisht në një kohë kur vëmendja e SHBA mund të zhvendoset diku tjetër.
Zelensky kritikoi gjithashtu mungesën e veprimit të Evropës ndaj luftës në Ukrainë, duke e krahasuar me pasigurinë e saj për situatën rreth Groenlandës. Ai paralajmëroi se pritja pasive që SHBA të zgjidhë problemet mund ta lërë Evropën të pambrojtur përballë kërcënimeve nga Rusia dhe Kina.
