Trump: Bisedimet për paqen në Gaza po ecin mirë. Netanyahu e propozon për Çmimin Nobel
E Martë 8 Korrik 2025, 08:08
Dritare.net
Presidenti i SHBA-së, Donald Trump, deklaroi se bisedimet për t’i dhënë fund luftës në Gaza po ecin “shumë mirë”, ndërsa priti kryeministrin izraelit Benjamin Netanyahu në Uashington. Trump shprehu gjithashtu besimin se Hamasi është i gatshëm t’i japë fund konfliktit 21-mujor. “Ata duan të takohen dhe të arrijnë një armëpushim”, tha ai në deklarata të papritura për gazetarët në Shtëpinë e Bardhë.
Takimi u zhvillua pas raundeve të fundit të bisedimeve indirekte për armëpushim mes Izraelit dhe Hamasit në Katar, të cilat përfunduan pa ndonjë përparim të dukshëm, ndonëse negociatat pritet të vazhdojnë këtë javë.
I pyetur nga një gazetar se çfarë po pengonte arritjen e një marrëveshjeje paqeje në Gaza, Trump u përgjigj: “Nuk mendoj se ka ndonjë pengesë. Gjërat po ecin shumë mirë.”
Të dy liderët u pyetën gjithashtu për planet e mundshme për zhvendosjen e palestinezëve. Trump deklaroi se kishte bashkëpunim nga disa vende fqinje të Izraelit në këtë drejtim. Nga ana tjetër, Netanyahu tha se po punonte me SHBA-në për të gjetur vende që do t’u ofrojnë palestinezëve “një të ardhme më të mirë”.
“Nëse njerëzit duan të qëndrojnë, le të qëndrojnë. Por nëse duan të largohen, duhet të kenë mundësi të ikin,” deklaroi Netanyahu.
Presidenca palestineze ka kundërshtuar më herët çdo plan për zhvendosjen e popullsisë palestineze, duke e cilësuar atë si një shkelje të ligjit ndërkombëtar.
Netanyahu gjithashtu minimizoi mundësinë për krijimin e një shteti të plotë palestinez, duke deklaruar se Izraeli do të mbajë gjithmonë kontrollin e sigurisë në Rripin e Gazës.
“Tani, disa do të thonë se kjo nuk është një shtetësi e plotë. Nuk është shtet. Ne nuk na intereson,” u shpreh Netanyahu.
Gjatë takimit, kryeministri izraelit tha gjithashtu se kishte propozuar Donald Trump për Çmimin Nobel për Paqen, një objektiv që raportohet të ketë qenë i rëndësishëm për presidentin amerikan.
“Po ndërton paqe para syve tanë, në një vend pas tjetrit, në një rajon pas tjetrit,” tha Netanyahu teksa i dorëzoi Trump-it një letër që kishte dërguar komitetit të Nobelit./K.C/dritare.net
