Si ta gatuani më së miri këtë fundvit, mbretin e tryezës, Gjelin e Detit! Zbulojeni
E Hënë 8 Dhjetor 2025, 16:04
Dritare.net
Në kuzhinën shqiptare, veçanërisht gjatë festave të fundvitit, asgjë nuk e zëvendëson dot Gjelin e Detit. Zonja Lela, shefja e kuzhinës në restorant Lisi na demonstron me detaje procesin e përgatitjes së gjelit, duke filluar nga marinimi i thjeshtë por efektiv me vaj ulliri, kripë dhe erëza natyrale. Ajo thekson se nuk ka nevojë për erëza të tepërta si koriandër apo të tjera që mund të mbulojnë shijen natyrale të mishit; thjeshtësia është çelësi.
Ajo çka e bën gjelin e këtij restoranti të veçantë nuk është ndonjë recetë komplekse sekrete, por mënyra e gatimit, pjekja në saç. Zonja Lela shpjegon se saçi, metoda tradicionale e pjekjes me prush nga sipër, i jep mishit një shije të papërsëritshme që furrat elektrike nuk mund ta imitojnë.
Aroma e drurit, tymi i lehtë dhe nxehtësia e shpërndarë në mënyrë uniforme bëjnë që lëkura të bëhet krokante ndërsa mishi brenda mbetet i lëngshëm dhe i butë. Procesi kërkon rreth 40 minuta për një zog fshati ose më shumë për gjelin e detit, kohë gjatë së cilës mishi thith të gjitha aromat e zjarrit.
Ndërkohë që gjeli piqet, Zonja Lela fillon përgatitjet për përsheshin. Ajo shpjegon se lëngu i gjelit është "ari i lëngshëm" i kësaj recete. Të brendshmet e gjelit zihen së bashku me lëngun i cili më vonë do të zbutë kulaçin.
Për Lelen, gatimi është trashëgimi. Ajo tregon se si pasionin e ka marrë nga gjyshja dhe mamaja e saj, e cila kishte punuar si kuzhiniere për vite me radhë. Kjo traditë tani po i pasohet brezit të ri, nuses dhe vajzës së saj. Në këtë pjesë të videos theksohet se si gatimi nuk është thjesht teknikë, por një akt dashurie dhe respekti për produktin vendas.
Të gjithë gjelat janë të rritur në zonë, duke garantuar freskinë dhe cilësinë bio që klientët kërkojnë. Përveç gjelit, Lela përmend edhe rëndësinë e shoqëruesve të tij, sallatat e lehta dhe turshitë e shtëpisë, të cilat janë të domosdoshme për të balancuar shijen e fortë të mishit./dritare.net
