Lanë Amerikën për Beratin! Djali kthen familjen në vendlindje, për të investuar në turizem!
E Premte 11 Korrik 2025, 19:07
Dritare.net
Historia e Robert Pushit është një shembull frymëzues i kthimit në rrënjë dhe besimit tek potenciali i vendit tënd. Pasi emigroi në Greqi në vitin 1995 në kërkim të një jete më të mirë, Roberti kaloi vite larg atdheut. Por ishte dashuria për qytetin e lindjes dhe, më së shumti, dëshira e djalit të tij, që e riktheu atë dhe familjen nga Amerika në Berat ku sot ka investuar në një hotel që mirëpret turistë nga e gjithë bota.
Për Robertin, kthimi nuk ishte një rastësi, por një vendim i menduar mirë. Ai tregon se megjithëse familja kishte dokumentacion të rregullt në SHBA dhe mundësi për të ndërtuar një jetë të qëndrueshme atje, ishte djali i tij që nguli këmbë për t’u kthyer në Shqipëri dhe për të ndërtuar diçka të vetën, në lagjen ku kishte lindur babai i tij.
“Sot, jam krenar që kemi bërë këtë hap. Turizmi në Berat ka lulëzuar dhe është një ndjesi e veçantë të ndihmosh në zhvillimin e qytetit tënd,” – thotë Roberti. Ai beson se Shqipëria ka një potencial të jashtëzakonshëm në turizëm, veçanërisht në qytete historike si Berati, dhe investimi në hotelin e tij është një mënyrë për të kontribuar konkretisht.
Roberti është një nga ata shqiptarë që provoi emigrimin, jetoi ëndrrën amerikane, por kuptoi se e vërteta ndodhet shumë më pranë – në shtëpi. Sot, ai dhe familja e tij jetojnë e punojnë në Berat, duke i dhënë jetë jo vetëm një biznesi, por edhe një shembulli që të tjerët mund të ndjekin.
“Kthimi ishte vendimi më i mirë që kemi marrë si familje,” – përfundon ai.
