Presidenti i Rusisë Vladimir Putin zhvilloi të hënën biseda telefonike me katër udhëheqës kryesorë të vendeve të Gjirit Persik, duke paralajmëruar për rrezikun që sulmet amerikane dhe izraelite ndaj Iranit mund të përshkallëzohen në një konflikt rajonal.
Pas bisedës me princin trashëgimtar të Arabisë Saudite, Mohammed bin Salman, Kremlini njoftoi se “të dyja palët shprehën shqetësim serioz për rrezikun real të zgjerimit të zonës së konfliktit, e cila tashmë ka prekur territoret e disa vendeve arabe dhe ka pasoja katastrofike.”
Putin theksoi nevojën për diplomaci për të adresuar një “situatë jashtëzakonisht të rrezikshme”, ndërsa princi trashëgimtar vuri në dukje se Moska mund të luajë një rol stabilizues falë marrëdhënieve të mira me Iranin dhe vendet e Gjirit.
Rusia ka dënuar në mënyrë të përsëritur sulmet amerikane dhe izraelite, si dhe vrasjen e udhëheqësit suprem iranian, Ayatollah Ali Khamenei.
Putin gjithashtu foli me presidentin e Emirateve të Bashkuara Arabe, Mohamed bin Zayed Al Nahyan, ku të dyja palët “theksuan nevojën për ndërprerjen e armiqësive dhe rikthimin në një proces politik dhe diplomatik.”
Kremlini njoftoi gjithashtu se gjatë bisedës me emiratin e Katarit, Tamim bin Hamad Al Thani, të dy udhëheqësit “shprehën shqetësim për rrezikun e zgjerimit të konfliktit në Lindjen e Mesme dhe për mundësinë që vende të treta të të përfshihen në të.”
Presidenti rus foli gjithashtu me mbretin e Bahreinit, duke theksuar rëndësinë e qetësimit të tensioneve në rajon./K.C/dritare.net
