Vuçiç në Davos: Rendi i ri global po sfidon sovranitetin e vendeve të vogla
E Martë 20 Janar 2026, 19:07
Dritare.net
Aleksandër Vuçiç mori pjesë në Forumin Ekonomik Botëror në Davos, ku foli për luftërat e shumta që kanë ndodhur dhe ende po zhvillohen në botë, si dhe për situatën globale që mund të presim në të ardhmen.
“Po flasim për paqe dhe stabilitet. Viti i kaluar ishte më i keqi që nga Lufta e Dytë Botërore sa i përket numrit të luftërave të nisura, dhe ky vit do të jetë edhe më i keq, ndërsa viti i ardhshëm do të jetë më i vështirë se ky,” tha Vučić.
Ai shtoi se, megjithëse të gjithë flasin për paqe dhe akuzojnë të tjerët për mosrespektim, në fund secili mbron interesat e veta kombëtare. “Askush nuk e ka më për zemër multilateralizmin, dhe ky është gabimi më i madh që të gjithë kemi bërë në të kaluarën, dhe tani askush nuk mund ta ndryshojë,” u shpreh ai.
Një tjetër pjesë e fjalimit të Vuçiçit u përqendrua te ruajtja e sovranitetit dhe pavarësisë së Serbisë në një botë ku ai vlerësoi se po krijohet një “rend i ri global” që mund të minojë pavarësinë e shteteve më të vogla. Ai theksoi se Serbia do të vazhdojë të mbrojë sovranitetin e saj pa i dorëzuar vendimet ndaj interesave të jashtme dhe se dialogu dhe bashkëpunimi rajonal janë çelësi për përballimin e sfidave të sotme.
Duke iu referuar marrëdhënieve ndërkombëtare dhe ndikimit të politikave globale, Vuçiç theksoi:
“Nëse prisni që Trump nesër të pajtohet me fjalët e Ursula von der Leyen, kjo nuk do të ndodhë. Të gjithë e dinë këtë. Pra, çfarë pasojash do të ketë kjo për të tjerët? Madje ka njerëz në vendet tona që mund të thonë: Kjo po ndodh larg nesh. Por ka një efekt të përhapjes, dhe të gjithë do të ndiejnë pasojat. Prandaj kam folur për krijimin e lidhjeve më të forta mes nesh, që të përballojmë këto tronditje në ekonomitë dhe politikat tona sa më shumë të jetë e mundur. Nuk jam optimist; kemi hyrë në një botë pasigurie dhe luhatjesh, dhe nuk jam i sigurt nëse do ta kapërcejmë këtë në vitet e ardhshme. Jam veteran këtu, marr pjesë prej 12 vitesh. Nuk ka njerëz që të kenë marrë pjesë kaq shumë herë. Nuk kam parë kurrë kaq shumë njerëz këtu, dhe njerëzit nuk duartrokasin askënd në Davos. Ata janë këtu sepse shqetësohen për të ardhmen e tyre. Përfaqësues kompanish, liderë biznesi, udhëheqës shtetesh, anëtarë të qeverive, askush nuk është i gëzuar. Askush nuk i buzëqesh askujt sepse nuk dinë çfarë do të sjellë e nesërmja për vendet e tyre. Sigurisht, jemi shumë të shqetësuar, por kur krijojmë lidhje dhe lidhemi së bashku, kjo është zgjidhja për ne. Ndoshta nuk mund të eliminojmë presionet, por mund t’i ulim ato mbi vendet tona. Ndoshta mund të gjejmë disa zgjidhje të mira si ndërmjetës të përbashkët për të gjitha vendet më të vogla në rajonin euro-aziatik.”/K.C/dritare.net
