Marrëveshja Trump–Iran mbetet mister, liderët e G7 kërkojnë më shumë qartësi
Tuesday 16 June 2026, 12:12
Dritare.net
Gjenevë, Zvicër – Liderët e vendeve më të fuqishme të botës kërkuan më shumë detaje mbi marrëveshjen e re të Presidentit amerikan Donald Trump me Iranin, por pas një darke të gjatë pune në Gjenevë, shumë prej tyre mbetën ende pa një pasqyrë të qartë mbi përmbajtjen e saj.
Sipas zyrtarëve të informuar për diskutimet, pas afro dy orësh bisedimesh, disa liderë u larguan nga takimi me të njëjtat paqartësi që kishin para tij. Teksti i plotë i marrëveshjes, një dokument rreth një faqe e gjysmë i firmosur virtualisht të dielën, ende nuk është bërë publik nga palët negociuese.
Mungesa e publikimit të dokumentit ka sjellë edhe deklarata të ndryshme nga Uashingtoni dhe Teherani për mënyrën se si do të zbatohet marrëveshja. Edhe zyrtarë të administratës amerikane kanë dhënë interpretime të ndryshme mbi disa pika të saj.
Presidenti Trump tha se dokumenti do të publikohet “së shpejti”, ndërsa më herët një zyrtar amerikan kishte deklaruar se teksti do të bëhej i njohur përpara ceremonisë zyrtare të firmosjes që pritet të zhvillohet në Zvicër të premten, me qëllim transparencën.
Një nga çështjet më të diskutuara lidhet me ngushticën e Hormuzit. Trump ka deklaruar se ajo do të jetë “përgjithmonë pa tarifa”, ndërsa pala iraniane ka insistuar se do të ruajë kontrollin mbi kalimin detar dhe mund të vendosë tarifa nëse do të jetë e nevojshme.
Gjithashtu, mbeten të hapura çështje të rëndësishme si programi bërthamor i Iranit, kontrolli ndërkombëtar, pasuritë e ngrira dhe lehtësimi i sanksioneve ekonomike.
Administrata amerikane ka deklaruar se Irani nuk do të përfitojë lehtësim financiar pa përmbushur detyrimet e marrëveshjes, ndërsa negociatat teknike pritet të përcaktojnë hapat konkretë të zbatimit.
Në takimet e ardhshme të G7 pritet të marrin pjesë edhe liderë nga Egjipti, Katari dhe Emiratet e Bashkuara Arabe, vende që kanë luajtur rol në procesin negociues dhe që pritet të ndihmojnë në një fond rindërtimi prej rreth 300 miliardë dollarësh për Iranin.
Megjithatë, pa publikimin e tekstit të plotë, shumë liderë dhe zyrtarë ndërkombëtarë mbeten në pritje për të kuptuar se çfarë është rënë realisht dakord mes Uashingtonit dhe Teheranit./L.F-dritare.net
