Meloni i përgjigjet Trumpit: Popullariteti im nuk është shqetësimi yt
Saturday 20 June 2026, 22:10
Dritare.net
Kryeministrja italiane Giorgia Meloni ka reaguar sërish ndaj presidentit amerikan Donald Trump, pasi ky i fundit vuri në dyshim popullaritetin e saj politik dhe përsëriti pretendimin se ajo kishte kërkuar vazhdimisht të fotografohej me të.
Trump deklaroi se Meloni “po ecën keq në Itali për sa i përket popullaritetit” dhe e akuzoi gjithashtu se nuk ka mbështetur përpjekjet amerikane për të penguar Iranin të zhvillojë armë bërthamore.
Në një reagim në Instagram, Meloni i quajti deklaratat e Trumpit “sulme të vazhdueshme dhe të paprovokuara”, duke shtuar se popullariteti i saj nuk varet nga marrëdhënia me presidentin amerikan.
“Popullariteti im nuk është shqetësimi yt. Të sugjeroj të përqendrohesh te i yti”, shkroi ajo.
Trump pretendoi gjithashtu se Meloni kishte shkaktuar vështirësi logjistike duke mos lejuar përdorimin e bazave italiane për operacionet ushtarake amerikane kundër Iranit. Nga ana tjetër, kryeministrja italiane theksoi se përdorimi i bazave rregullohet nga marrëveshje që Italia i respekton dhe që nuk mund të shkelen.
Polemikat mes dy liderëve nisën pas samitit të G7 në Francë, ku Trump pretendoi se Meloni kishte “lutur” për një fotografi me të. Kryeministrja italiane e mohoi kategorikisht këtë deklaratë, duke u shprehur se “as ajo dhe as Italia nuk lypin kurrë”.
Shkëmbimi i deklaratave ka nxjerrë në pah tensione të reja mes dy liderëve, të cilët deri vonë konsideroheshin aleatë të afërt politikë.
