Doni të udhëtoni? Ja zhvillimet e fundit nga aeroportet!
E Enjte 19 Mars 2026, 08:08
Dritare.net
Situata e tensionuar në Lindjen e Mesme po ndikon drejtpërdrejt në trafikun ajror, me disa nga linjat më të mëdha ajrore që kanë reduktuar ose pezulluar fluturimet në rajon.
British Airways njofton se “reduktimi i përkohshëm” i fluturimeve vijon, ndërsa janë pezulluar udhëtimet drejt dhe nga Amani, Bahreini, Doha, Dubai, Abu Dhabi dhe Tel Avivi. Kompania ka shtuar ndërkohë fluturime midis Londrës, Singaporit dhe Bangkokut për të ndihmuar pasagjerët.
Qatar Airways do të operojë një numër të kufizuar fluturimesh nga 18 deri më 28 mars 2026, por paralajmëron se orari mund të ndryshojë në varësi të kushteve të hapësirës ajrore dhe miratimeve rregullatore.
Emirates po operon me orar të reduktuar dhe u jep mundësi pasagjerëve të rirezervojnë fluturimet deri më 15 prill.
Ndërsa Qantas ofron fleksibilitet për të gjithë pasagjerët që udhëtojnë drejt, nga ose nëpër Emiratet e Bashkuara Arabe, Katarin, Izraelin, Jordaninë, Omanin dhe Bahreinin, po ashtu deri më 15 prill.
Në të njëjtën kohë, rritja e çmimeve të naftës dhe karburantit për avionë, si pasojë e konfliktit, po ndikon në koston e udhëtimit. Qantas, Air New Zealand dhe Thai Airways kanë konfirmuar tashmë rritje të çmimeve të biletave.
Nga ana tjetër, kompania mëmë e British Airways, IAG, ka deklaruar se ka blerë karburant paraprakisht për t’u mbrojtur nga rritjet afatshkurtra të çmimeve./BBC
