Ja çfarë del nga dokumentet e Epstein për çiftin Clinton!
E Hënë 2 Shkurt 2026, 08:08
Dritare.net
CNN
Departamenti Amerikan i Drejtësisë ka publikuar një seri të re dokumentesh lidhur me çështjen Jeffrey Epstein, të cilat hedhin dritë mbi komunikimet mes stafit të ish-presidentit Bill Clinton dhe bashkëpunëtores së Epsteinit, Ghislaine Maxwell. Dokumentet përfshijnë email-e private, disa prej tyre me fjalë të papërshtatshme, të shkëmbyera gjatë viteve 2001–2004.
Publikimi vjen vetëm disa ditë para një vote të pritshme në Dhomën e Përfaqësuesve, pasi ata refuzuan të dëshmojnë në një hetim dypartiak për lidhjet me Epstein. Edhe pse veprimi do të ishte kryesisht simbolik, ai mund të pasohet me referim në Departamentin e Drejtësisë për veprime të mëtejshme ligjore.
Dosjet e reja – mbi 3 milionë dokumente – pasojnë një publikim të mëparshëm në dhjetor, i cili përfshinte fotografi të panjohura më parë të Bill Clintonit me Epstein. Sipas analizës së CNN, Clinton ka udhëtuar të paktën 16 herë me avionin privat të Epstein.
Dokumentet tregojnë komunikime të shpeshta mes Maxwellit dhe adresave email të lidhura me zyrën post-presidenciale të Clintonit, të shënuara si “WJC”. Zëdhënësi i Clintonit, Angel Ureña, ka deklaruar se ish-presidenti nuk ka dërguar asnjë nga këto email-e dhe se ai pothuajse nuk ka përdorur kurrë email gjatë jetës së tij.
Shumica e komunikimeve lidhen me organizimin e udhëtimeve, darkave dhe ftesave të minutës së fundit. Në disa raste, Maxwell shfaqet flirtuese në email-e drejtuar stafit të Clintonit. Nuk ka prova që Maxwell dhe Bill Clinton të kenë komunikuar drejtpërdrejt me email.
Në dokumente përfshihet gjithashtu një listë akuzash të paverifikuara ndaj figurave të njohura publike, përfshirë ish-presidentin Donald Trump dhe Bill Clinton. Të dy kanë mohuar çdo lidhje. Shtëpia e Bardhë ka theksuar se disa materiale mund të jenë të rreme ose të paraqitura gabimisht.
Pavarësisht akuzave publike ndaj saj që nga viti 2009, Maxwell ka vazhduar të marrë pjesë në rrethe të afërta me Clintonët, përfshirë Konferencën e Iniciativës Globale Clinton në vitin 2013.
Ndërkohë, negociatat mes avokatëve të Clintonëve dhe Komitetit të Mbikëqyrjes në Dhomën e Përfaqësuesve vazhdojnë, dhe ende ekziston mundësia për një marrëveshje përpara votimit përfundimtar në Kongres./L.F-dritare.net
