PS vendosi për mosarrestimin e Ballukut! Çfarë vjen më pas! Flet eksperti ligjor Alban Duraj
E Hënë 9 Mars 2026, 17:05
Dritare.net
Në një lidhje të drejtpërdrejtë për DritareTV, eksperti ligjor Alban Duraj komentoi vendimin e PS-së për mosarrestimin e ish-zëvendëskryeministres Berlinda Balluku. Ai theksoi rëndësinë e respektimit të procedurave ligjore dhe parimit të barazisë para ligjit.
“Çdo qytetar, përfshirë edhe zyrtarët e nivelit të lartë, duhet të përballet me drejtësinë në mënyrë të barabartë,” tha Duraj. Ai shtoi se “përdorimi i imunitetit nuk duhet të pengojë hetimet apo vendimet e organeve të drejtësisë.”
Avokati shpjegoi gjithashtu se vendimi i Kuvendit është pjesë e procesit formal ligjor dhe se gjykata do të vendosë mbi kërkesën e Prokurorisë së Posaçme lidhur me masat shtrënguese: “Gjykata do të vendosë nëse ka prova të mjaftueshme për vendosjen e masës së sigurimit personal.”
Duraj nënvizoi se votimi i fshehtë i deputetëve, i planifikuar për datën 12, është një hap procedurial: “Deputetët janë ata që vendosin dhe çdo vendim i tyre duhet të reflektojë Kushtetutën dhe ligjet e Republikës së Shqipërisë.”
Ai përmendi gjithashtu rëndësinë e transparencës dhe reagimeve ndërkombëtare: “Presim reagime nga Bashkimi Evropian dhe Shtetet e Bashkuara, pasi reforma në drejtësi dhe lufta kundër korrupsionit janë elementë kyç për vendin.”
Duraj përfundoi duke theksuar se procesi ligjor duhet të ndiqet me kujdes dhe se të gjithë qytetarët duhet të kenë të njëjtat të drejta përballë ligjit./K.C/dritare.net
