Ndryshime në Kodin Penal. Kush parkon dysh, shkon në burg!
E Premte 23 Janar 2026, 16:04
Dritare.net
Ndryshime të rëndësishme në Kodin Penal janë miratuar në Komisionin për Evropën dhe Punët e Jashtme, i cili u mblodh pa praninë e deputetëve të opozitës, të angazhuar në terren për përgatitjet e protestës së paralajmëruar për të shtunën. Vendimi më i debatueshëm lidhet me parkimin në rresht të dytë, i cili nga një shkelje administrative e ndëshkuar me gjobë, tashmë konsiderohet vepër penale e dënueshme me burg.
Sipas ndryshimeve të miratuara, parkimi dysh shihet si rrezik serioz për sigurinë rrugore, pasi pengon qarkullimin e mjeteve emergjente, bllokon rrugët dhe krijon vështirësi për këmbësorët. Relatori i projektligjit, deputeti socialist Ervin Hoxha, argumentoi se ashpërsimi i masave penale synon rritjen e efektit parandalues të ligjit dhe garantimin e një qarkullimi më të sigurt për qytetarët, si dhe krijimin e një kuadri më të qartë ligjor për ndërhyrje të shpejta nga organet e rendit në situata emergjente.
Përveç kësaj, ndryshimet në Kodin Penal përfshijnë edhe dekriminalizimin e shpifjes, si dhe forcimin e mbrojtjes ligjore për gazetarët gjatë ushtrimit të detyrës. Sulmet, kërcënimet apo format e intimidimit ndaj gazetarëve do të trajtohen njësoj si ato ndaj punonjësve të shtetit, duke rritur ndjeshëm nivelin e sigurisë për median. Hoxha theksoi se dhuna ndaj gazetarëve do të dënohet me 1 deri në 5 vite burg.
Në të njëjtën mbledhje u miratuan edhe ndryshime në ligjin për importin, eksportin dhe transitin e armëve të zjarrit. Ministri i Mbrojtjes, Pirro Vengu, bëri të ditur se këto ndryshime synojnë vendosjen e një sistemi të ri elektronik për kontrollin dhe parandalimin e trafikut të paligjshëm të armëve./K.C/dritare.net
