Rama: Jam nisur për në Hagë, do të takoj Hashim Thaçin!
E Enjte 18 Dhjetor 2025, 09:09
Dritare.net
Kryeministri Edi Rama, gjatë një komunikimi live me qytetarët në Facebook, tha se shpreson që gjatë vitit të ardhshëm Gjykata e Hagës të japë një vendim pafajësie për Hashim Thaçin, si dhe për tre ish-krerët e Ushtrisë Çlirimtare të Kosovës.
Sipas Ramës, vetëm një vendim i tillë do të përbënte “shlyerjen e kësaj fatkeqësie”, duke iu referuar procesit gjyqësor që po zhvillohet ndaj ish-udhëheqësve të UÇK-së.
Kreu i qeverisë bëri me dije se është nisur drejt Hagës, ku do të zhvillojë një takim me Hashim Thaçin, të cilin e cilësoi si “komandantin e Ushtrisë Çlirimtare dhe presidentin e Republikës së Kosovës, i marrë nga zyra e tij dhe i mbajtur prej vitesh në një qeli të drejtësisë ndërkombëtare”.
Rama kritikoi procesin gjyqësor, duke e quajtur një “farsë”, dhe akuzoi institucionin për shkelje të standardeve ndërkombëtare, të drejtave të njeriut dhe normave të procesit të rregullt ligjor.
“Një president i zgjedhur në mënyrë demokratike, së bashku me tre bashkëluftëtarë që kanë mbajtur detyra të rëndësishme në Republikën e Kosovës, mbahen të izoluar pa u dënuar,” u shpreh Rama.
Uroj që viti i ardhshëm të jetë perdja e mbylljes së këtij tetari absurd të kësaj gjykate dhe të jepet pafajësia për Hashim Thaçin dhe bashkëluftëtarëve të tjerë. Njerëz që të vetmin faj kanë që u rebeluan ndaj regjimit dhe morën armë për të mbrojtur lirinë dhe dinjitetin e tyre njerëzor. Kjo është e vërteta dhe këtë të vërtetë nuk e tund dot askush, e jo më një çekiç absurd që ka lënë kokrrën e namit”, tha Rama.
