SHBA drejt bllokadës në Hormuz, Trump: Asnjë anije nuk kalon pa leje
E Diel 12 Prill 2026, 15:03
Dritare.net
Presidenti i Shtetet e Bashkuara, Donald Trump, ka paralajmëruar masa të ashpra ndaj Iranit, duke njoftuar nisjen e një bllokade detare në Ngushticën e Hormuzit – një nga rrugët më të rëndësishme të tregtisë globale të naftës.
Në një seri postimesh në rrjetin “Truth Social”, Trump deklaroi se Irani ka dështuar të mbajë premtimin për rihapjen e kësaj rruge ujore ndërkombëtare, duke shkaktuar, sipas tij, “ankth, çrregullim dhe pasoja për shumë vende në botë”.
Trump bëri të ditur se ka urdhëruar Marinën Amerikane të ndërhyjë ndaj çdo anijeje që përpiqet të hyjë ose të dalë nga Ngushtica e Hormuzit.
Ai deklaroi se:
SHBA do të “bllokojë çdo anije” që kalon në këtë zonë
Do të ndalojë dhe kontrollojë mjetet detare në ujërat ndërkombëtare
Do të shkatërrojë minat detare që, sipas tij, janë vendosur nga Irani
Presidenti amerikan shtoi gjithashtu se çdo anije që ka paguar tarifa ndaj Iranit për kalim nuk do të konsiderohet e sigurt.
Retorika u ashpërsua më tej, duke paralajmëruar se çdo sulm ndaj forcave amerikane apo anijeve civile do të përballet me përgjigje të menjëhershme ushtarake.
Duke iu referuar bisedimeve të zhvilluara në Islamabad, Trump tha se negociatat zgjatën rreth 20 orë dhe se shumica e pikave u dakordësuan, por çështja kryesore – programi bërthamor i Iranit – mbeti pa zgjidhje.
Ai theksoi se ishte informuar nga zyrtarë të lartë, përfshirë nënpresidentin JD Vance dhe ekipin negociator amerikan.
Sipas Trump, problemi kryesor është se Irani “nuk është i gatshëm të heqë dorë nga ambiciet e tij bërthamore”, duke e cilësuar këtë si rrezikun më të madh për sigurinë globale.
Ngushtica e Hormuzit është një nga pikat më strategjike në botë për transportin e naftës, dhe çdo përshkallëzim në këtë zonë mund të ndikojë drejtpërdrejt në tregjet globale dhe ekonominë ndërkombëtare.
Deklaratat e Trump sinjalizojnë një rritje të tensioneve në Lindjen e Mesme, ndërsa mbetet e paqartë se si do të reagojë Irani dhe komuniteti ndërkombëtar ndaj këtyre paralajmërimeve.
Situata mbetet dinamike dhe me rrezik të lartë për përshkallëzim të mëtejshëm./L.F-dritare.net
