SHBA ndalon hyrjen e pesë evropianëve! Ja për çfarë akuzohen!
E Mërkurë 24 Dhjetor 2025, 08:08
Dritare.net
Departamenti i Shtetit i Shteteve të Bashkuara njoftoi të martën se ka ndaluar hyrjen në vend të pesë shtetasve evropianë, të cilët i akuzon se kanë udhëhequr përpjekje për të ushtruar presion mbi kompanitë amerikane të teknologjisë me qëllim censurimin ose shtypjen e pikëpamjeve amerikane.
Sekretari i Shtetit, Marco Rubio, i cilësoi këta individë si aktivistë “radikalë” dhe organizata joqeveritare “të armatosura”, duke theksuar se veprimet e tyre bien ndesh me një politikë të re vizash të shpallur në muajin maj. Kjo politikë synon të kufizojë hyrjen e të huajve që konsiderohen përgjegjës për censurimin e fjalës së mbrojtur nga Kushtetuta amerikane.
“Për një kohë shumë të gjatë, ideologë në Evropë kanë udhëhequr përpjekje të organizuara për të detyruar platformat amerikane të ndëshkojnë pikëpamje amerikane që ata i kundërshtojnë,” shkroi Rubio në rrjetin social X. “Administrata Trump nuk do t’i tolerojë më këto akte të shëmtuara të censurës ekstraterritoriale.”
Pesë evropianët u identifikuan publikisht nga Sarah Rogers, nënsekretare e shtetit për diplomacinë publike, përmes një serie postimesh në rrjetet sociale. Mes tyre përfshihen drejtues të organizatave që merren me luftën kundër urrejtjes dixhitale, si edhe ish-komisioneri i Bashkimit Evropian për çështjet dixhitale, Thierry Breton.
Sipas Departamentit të Shtetit, këta individë kanë shtyrë përpara fushata censurimi të mbështetura nga qeveri të huaja kundër qytetarëve dhe kompanive amerikane, duke krijuar, sipas Rubios, “pasoja potencialisht serioze negative për politikën e jashtme të SHBA-së”.
Vendimi për ndalimin e hyrjes në SHBA është pjesë e një fushate më të gjerë të administratës Trump kundër ndikimit të huaj mbi fjalimin online, duke përdorur ligjin e imigracionit si mjet, në vend të rregulloreve të platformave ose sanksioneve tradicionale.
Personat e ndaluar janë: Imran Ahmed, drejtor ekzekutiv i Qendrës për Kundërshtimin e Urrejtjes Dixhitale; Josephine Ballon dhe Anna-Lena von Hodenberg, drejtues të organizatës gjermane HateAid; Clare Melford, drejtuese e Indeksit Global të Dezinformimit; si dhe Thierry Breton, ish-komisioner i BE-së për çështjet dixhitale.
Në një postim në X, Rogers e cilësoi Bretonin si “trurin” pas Aktit të Shërbimeve Dixhitale të BE-së (DSA), një ligj që vendos kërkesa të rrepta për platformat online, përfshirë detyrimin për të sinjalizuar përmbajtje të dëmshme ose të paligjshme, si gjuha e urrejtjes. Ajo iu referua gjithashtu paralajmërimit që Breton i kishte bërë Elon Musk për “amplifikimin e mundshëm të përmbajtjes së dëmshme”, pas transmetimit të drejtpërdrejtë të një interviste me Donald Trump në gusht 2024.
Breton reagoi të martën në X, duke theksuar se Akti i Shërbimeve Dixhitale u miratua në vitin 2022 nga të 27 vendet anëtare të Bashkimit Evropian. “Për miqtë tanë amerikanë: censura nuk është aty ku mendoni se është,” shkroi ai.
Edhe Franca reagoi ashpër ndaj vendimit. Ministri i Jashtëm francez, Jean-Noël Barrot, dënoi kufizimet e vizave për Bretonin dhe katër të tjerët, duke deklaruar se DSA synon të garantojë që “ajo që është e paligjshme jashtë linje të jetë e paligjshme edhe në internet”. Ai theksoi se ligji nuk ka shtrirje jashtë territorit të BE-së dhe “nuk cenon në asnjë mënyrë Shtetet e Bashkuara”.
Shumica e shtetasve evropianë përfshihen në Programin e Heqjes së Vizave, që u lejon atyre të hyjnë në SHBA pa vizë, por me kusht që të plotësojnë një aplikim online përmes sistemit të Departamentit të Sigurisë Kombëtare. Një zyrtar amerikan, duke folur në kushte anonimiteti, tha se është e mundur që disa nga këta pesë persona të jenë sinjalizuar në këtë sistem.
Kufizimet e reja të vizave janë pjesë e një vale më të gjerë masash të shpallura këtë vit nga administrata Trump, të cilat përfshijnë edhe ndalime për vizitorë nga disa vende afrikane dhe të Lindjes së Mesme, si dhe masa ndaj Autoritetit Palestinez. Në disa raste, aplikantëve për vizë mund t’u kërkohet edhe paraqitja e një garancie financiare.
