Zhvillimet e fundit nga konflikti në Lindjen e Mesme!
E Martë 3 Mars 2026, 07:07
Dritare.net
Në ditën e katërt të përballjes ushtarake mes SHBA-së, Izraelit dhe Iranit, situata në Lindjen e Mesme vijon të përshkallëzohet me zhvillime të rënda në disa fronte.
Izraeli ka nisur një valë të re “sulmesh ajrore të gjera” ndaj atyre që i cilëson si objektiva ushtarake në Teheran dhe Bejrut. Ndërkohë, ambasada amerikane në Riad është goditur nga dy dronë, sipas Ministrisë së Mbrojtjes së Arabisë Saudite, duke shkaktuar një zjarr të kufizuar.
Media shtetërore iraniane pretendon se është shkatërruar një ndërtesë komande dhe personeli në një bazë ajrore amerikane në Bahrein. Një zyrtar iranian ka kërcënuar se do t’i “vërë flakën” çdo anijeje që përpiqet të kalojë në Ngushticën e Hormuzit – një arterie jetike për furnizimet globale me energji.
Sekretari amerikan i Shtetit, Marco Rubio, deklaroi se “goditjet më të rënda ende nuk kanë ardhur”, ndërsa Donald Trump i cilësoi sulmet si “shansin e fundit dhe më të mirë” për të eliminuar kërcënimet nga Teherani.
Sipas të dhënave zyrtare, gjashtë ushtarakë amerikanë janë vrarë që nga nisja e konfliktit. Tre avionë luftarakë amerikanë u rrëzuan në Kuvajt në një incident të dyshuar si “zjarr miqësor”, por ekuipazhet mbijetuan.
Në Londër, kryeministri britanik Keir Starmer u shpreh se “nuk beson në ndryshimin e regjimit nga qielli”, por konfirmoi se Britania po lejon SHBA-në të përdorë bazat e saj ushtarake për sulme që i cilësoi si “mbrojtëse”.
Ndërkohë, Ambasada Amerikane në Kuvajt është mbyllur “deri në njoftim të mëtejshëm”, duke përmendur tensionet e vazhdueshme rajonale. Janë anuluar të gjitha takimet konsullore, ndërsa Departamenti Amerikan i Shtetit u ka bërë thirrje qytetarëve amerikanë në disa vende të rajonit të largohen për shkak të rreziqeve serioze të sigurisë./E.P/dritare.net
