Meta nuk e përmban veten: Fitojmë bashkitë e mëdha, Tiranën, Durrësin dhe Elbasanin!
E Premte 13 Janar 2023, 22:10
Dritare.net
Kryetari i Partisë së Lirisë, Ilir Meta ka bërë parashikimin e tij për zgjedhjet e 14 majit 2023 ku thotë se opozita e frontit Berisha-Meta do të fitojë bashkitë e mëdha, siç janë Tirana, Durrësi dhe Elbasani.
Belind Këlliçi, Igli Cara dhe Luçiano Boçi janë kandidatë të padiskutueshëm dhe superiorë, tha Meta në Syri Tv.
"Tiranën, Elbasanin dhe Durrësin e fiton opozita. Belind Këlliçi në Tiranë, është figurë e re, doli nga një proces transparent. Igli Cara në Durrës, Luçiano Boçi në Elbasan. Këta do të votohen. Luçiano Boçi figurë e re është, ka qenë ndonjëherë kryetar bashkie? Intelektual. Igli Cara, ka qenë ndonjëherë kryetar i bashkisë së Durrësit? Figurë e re është. Janë kandidatë të padiskutueshëm, superiorë në të gjitha aspektet. Kandidojnë për herë të parë në këtë detyrë.
15 maji do të jetë një ditë shumë herë më e mirë për Shqipërinë se 14 maji dhe do të çelë një stinë shumë të zjarrtë ndryshimesh por edhe rikthimin të entuziazmit dhe besimit të njerëzve te demokracia, llogaridhënia dhe tek forcat politike që nuk janë të gjitha njësoj", u shpreh Meta./dritare.net
