Vritet me armë zjarri një 45-vjeçar në Mirditë, viktima gjendet brenda automjetit
Monday 15 June 2026, 09:09
Dritare.net
Një ngjarje e rëndë kriminale ka tronditur mëngjesin e kësaj të hëne zonën e Mirditës. Rreth orës 07:10, në fshatin Shkorrët, përgjatë aksit rrugor Reps–Spaç, është gjetur i pajetë brenda automjetit të tij një 45-vjeçar, i vrarë me armë zjarri.
Viktima është identifikuar si Valter Lleshi, i cili sipas informacioneve paraprake ishte duke udhëtuar me një automjet tip Toyota kur është qëlluar për vdekje. Ai punonte në kompaninë e nxjerrjes së bazaltit në Spaç.
Forcat e policisë kanë mbërritur menjëherë në vendngjarje dhe kanë nisur hetimet intensive për zbardhjen e plotë të rrethanave të krimit. Deri më tani nuk dihen motivet e vrasjes dhe as autorët e saj.
Grupi hetimor po punon për mbledhjen e provave dhe verifikimin e çdo piste që mund të ndihmojë në zbardhjen e kësaj ngjarjeje të rëndë./L.F-dritare.net
