Berisha: Parlamenti të merret vetëm me kërkesat e qytetarëve!
Tuesday 23 June 2026, 13:01
Dritare.net
Kreu i Partisë Demokratike, Sali Berisha, deklaroi se opozita mbështet kërkesat e paraqitura nga protestuesit. Berisha u shpreh se Partia Demokratike bie dakord edhe me propozimin për krijimin e një qeverie tranzitore apolitike, duke e konsideruar atë si një zgjidhje për situatën politike në vend.
“Kërkesat e paraqitura dje garantojnë protestuesit se do të konsiderohen me seriozitetin më të madh, si në aktivitetin tonë direkt kombëtar, ashtu dhe aktivitetin tonë ndërkombëtar. Mbështetja ndaj tyre përbën një nga motivet më themelore të angazhimit tonë total, jo me simbolet dhe sloganet tona, por si anëtarësi dhe mbështetës të Partisë Demokratike, bazuar në fibrën qytetare”, tha Berisha.
Diasporës i kërkon të vijojë të bëhet pjesë e protestës kundër kryeministrit Edi Rama, me shpresën e largimit të këtij të fundit.
“Rama të largohet 1 min e më parë, edhe prapa diellit të shkojë, shkon si një hajdut i kombit të tij”, tha Berisha.
Ndërsa parlamentit, edhe pse mes një axhendë të ngjeshur të ligjeve për integrimin, i kërkon të ndërpresë çdo aktivitet dhe të marrë në shqyrtim vetëm kërkesat e protestuesve.
“Insistojmë që parlamenti të ndërpresë çdo lloj aktiviteti tjetër dhe të merret me trajtimin e kërkesave të protestës së rinisë dhe qytetarëve shqiptarë”, tha Berisha.
PD depozitoi sot edhe një tjetër kërkesë, për mocion me debat mbi kërkesat e protestuesve. Selia blu kërkon që seanca për mocionin me debat të zhvillohet këtë të enjte, pasi këtë javë nuk do të ketë seancë plenare.
