Del fotografia e parë e përbashkët e Princit Andrew, Peter Mandelson dhe Jeffrey Epstein
E Premte 13 Mars 2026, 19:07
Dritare.net
Një fotografi e panjohur më parë ku shfaqen së bashku Prince Andrew, Peter Mandelson dhe financieri i dënuar për abuzime seksuale Jeffrey Epstein është zbuluar në dokumentet e publikuara nga U.S. Department of Justice (DOJ). Sipas raportimit të ITV News, kjo është fotografia e parë e njohur ku tre burrat shfaqen së bashku. Dokumentet nuk japin informacion të saktë për kohën apo vendin ku është bërë fotoja. Megjithatë, besohet se ajo është realizuar në Martha’s Vineyard në SHBA, rreth viteve 1999–2000, përpara se Epstein të dënohej me 13 muaj burg dhe të regjistrohej si abuzues seksual.
Në foto, tre burrat shihen të ulur rreth një tavoline druri në një verandë, ndërsa përpara tyre ndodhen filxhanë të zbukuruar me flamurin amerikan. Dokumentet nuk tregojnë se prania e tyre në fotografi përbën automatikisht shkelje ligjore.
Ndërkohë, Prince Andrew dhe Lord Mandelson janë arrestuar veçmas në Britani nën dyshimin për shpërdorim detyre publike, në lidhje me raportet e tyre me Epstein. Të dy janë liruar më pas ndërsa hetimet vazhdojnë.
Prince Andrew ka mohuar vazhdimisht çdo veprim të paligjshëm në lidhje me Epstein. Nga ana tjetër, Mandelson ka deklaruar prej kohësh se nuk beson se ka kryer ndonjë vepër penale, duke theksuar se ai kishte pranuar versionin e ngjarjeve të dhënë nga Epstein dhe avokati i tij dhe se të vërtetën e kishte kuptuar vetëm pas vdekjes së financierit në vitin 2019.
Prince Andrew ka thënë se e takoi për herë të parë Epstein në vitin 1999 përmes Ghislaine Maxwell, partnerja britanike e Epstein, të cilën ai e njihte që nga koha kur ajo studionte në universitet.
Lidhjet e tyre me financierin kanë pasur pasoja të mëdha për të dy. Prince Andrew është privuar nga titujt mbretërorë, ndërsa Mandelson u shkarkua nga posti i ambasadorit të Mbretërisë së Bashkuar në SHBA.
Prince Andrew është akuzuar gjithashtu se ka pasur marrëdhënie seksuale me Virginia Giuffre kur ajo ishte ende adoleshente. Çështja civile e ngritur nga Giuffre përfundoi me një marrëveshje jashtë gjykate pa pranimin e fajësisë nga ana e tij, ndërsa ai ka mohuar me forcë akuzat./K.C/dritare.net
Ai u arrestua në mes të muajit shkurt në Norfolk, pasi policia po shqyrtonte një ankesë për ndarjen e materialeve konfidenciale me Epstein gjatë kohës kur shërbente si i dërguar i tregtisë së Mbretërisë së Bashkuar në periudhën 2001–2011.
