Kërcënon Putini: Nëse Ukraina na sulmon me armë perëndimore, do futemi në luftë me vendet e NATO-s
E Enjte 12 Shtator 2024, 21:09
Dritare.net
Presidenti rus po ngre zërin ndërsa lufta me Ukrainën është në një moment kritik. Vladimir Putin deklaroi se nëse Perëndimi lejon Ukrainën të kryejë sulme në territorin rus me raketa me rreze të gjatë veprimi që i janë furnizuar Kievit nga vendet perëndimore, kjo do të thotë se "vendet e NATO-s janë në luftë me Rusinë".
“Nëse merret ky vendim, nuk do të thotë asgjë më pak se përfshirja e drejtpërdrejtë e vendeve të NATO-s në luftën në Ukrainë. Kjo do të ndryshonte vetë natyrën e luftës. Kjo do të thotë se vendet e NATO-s janë në luftë kundër Rusisë.”, tha Putin në një video të postuar në Telegram nga një gazetar që mbulon presidencën ruse.
Megjithatë, pak më herët, Rusia raportoi se kishte rimarrë 10 fshatra në rajonin e Kurskut, aty ku Ukraina nisi një pushtim në shkallë të gjerë muajin e kaluar.
“Trupat çliruan 10 vendbanime për dy ditë.”, tha ministri rus i Mbrojtjes në një postim në Telegram.
Ndërkohë, kushte të reja po krijohen nga agresioni rus në frontin e luftës me Ukrainën, gjë që e vë komunitetin perëndimor në një gjendje shqetësimi dhe alarmi për nivelin e mbështetjes që do t'i japë Kievit. Volodymyr Zelensky tha më herët se ushtria ruse ka filluar kundërsulmin në rajonin perëndimor të Rusisë, Kursk.
Ai tha gjithashtu se Ukraina priste një kundërsulm. Në përpjekje për të demonstruar brutalitetin rus, Zelensky vazhdoi me postimin e mëposhtëm në platformën X, shoqëruar me një foto:
“Një tjetër krim nga Rusia. Sot sulmuesi hapi zjarr ndaj automjeteve të Komitetit Ndërkombëtar të Kryqit të Kuq që ofronte ndihmë humanitare në rajonin e Donjeckut. Siç dihet dy persona të lënduar po marrin ndihmë speciale. Megjithatë, për fat të keq, tre persona u vranë nga sulmi rus. Shpreh ngushëllimet e mia të sinqerta për familjet dhe miqtë e viktimave. Në këtë luftë gjithçka është absolutisht e qartë për sa i përket brutalitetit rus. Ukraina mbron jetën. Nëse dikush dëshiron t’i dëgjojë të dyja palët, në Rusi kjo perceptohet si e drejta për të marrë jetë. Bota duhet të përgjigjet me guxim dhe moral. Shtetet dhe organizatat ndërkombëtare nuk mund të qëndrojnë indiferente. Vetëm së bashku mund të bëjmë presion ndaj Rusisë që të ndalojë terrorizmin dhe të sjellim paqen.”, shkroi presidenti ukrainas./K.C/dritare.net
