Ministrja britanike jep dorëheqje, i dërgon një mesazh të fortë Starmer
E Martë 12 Maj 2026, 16:04
Dritare.net
Ministrja britanike Jess Phillips ka dhënë dorëheqjen nga qeveria e Partisë Laburiste, duke i dërguar një mesazh të drejtpërdrejtë kryeministrit Keir Starmer se “veprat, jo fjalët, kanë rëndësi”.
Dorëheqja e saj vjen në një moment shumë të vështirë për Starmer, pas humbjeve të rënda të Laburistëve në zgjedhjet lokale dhe rritjes së pakënaqësive brenda partisë. Vetëm pak orë para largimit të Phillips, Starmer kishte deklaruar se nuk kishte ndërmend të jepte dorëheqjen dhe se do të vazhdonte drejtimin e qeverisë.
Në letrën e dorëheqjes, Phillips kritikoi mungesën e veprimeve konkrete nga qeveria, sidomos për mbrojtjen e grave dhe fëmijëve nga dhuna dhe abuzimi online. Ajo tha se nuk mjafton vetëm retorika politike, por duhen rezultate reale.
“Veprat, jo fjalët, kanë rëndësi”, shkroi ajo, duke lënë të kuptohet se kishte humbur besimin te drejtimi aktual i qeverisë.
Dorëheqja e saj konsiderohet një goditje serioze për Starmer, ndërsa raportimet në Britani flasin për tensione të forta brenda Partisë Laburiste dhe kërkesa në rritje për ndryshim lidershipi. Sipas mediave britanike, dhjetëra deputetë laburistë janë të pakënaqur me drejtimin aktual pas rënies së mbështetjes publike.
Phillips ishte një nga figurat më të njohura të Laburistëve dhe shpesh ishte vlerësuar për qëndrimet e saj të forta në mbrojtje të grave dhe viktimave të dhunës./K.C/dritare.net
