Ne foto Edi Rama dhe Nigel Farage
Në një intervistë të fundit për Times Radio, Kryeministri i Shqipërisë, Edi Rama, ka reaguar ndaj deklaratave të Nigel Farage për numrin e shqiptarëve të burgosur në Mbretërinë e Bashkuar, duke e quajtur këtë perceptim një "gënjeshtër tipike" të përdorur për qëllime politike. Rama e ftoi Farage të vizitojë Shqipërinë për të parë nga afër realitetin dhe për të lënë mënjanë “teatralitetin politik” që, sipas tij, është shpesh pjesë e propagandës.
Në lidhje me komentet e Farage për numrin e të burgosurve shqiptarë, Rama theksoi se, sipas të dhënave të besueshme, Shqipëria nuk dallohet në mënyrë të jashtëzakonshme nga shtetet e tjera për këtë çështje.
Ai e përshkroi këtë si një narrativë të krijuar për të ngjallur frikë dhe për të mbështetur fushata politike të caktuara, duke i referuar premtimet e gabueshme të bëra gjatë fushatës për Brexit.
“Nëse shikon burime të besueshme, nuk ka një numër të jashtëzakonshëm të shqiptarëve të burgosur në Mbretërinë e Bashkuar. Ky është një perceptim i gabuar dhe një pjesë e propagandës, ashtu siç ishte edhe premisa se do të fitoheshin miliarda për NHS-në pas Brexit,” tha Rama.
Ftesa e Ramës për Farage
Në përgjigje të pyetjes se a do të mund të bashkëpunonte ndonjëherë me Farage për marrëveshje politike, Rama theksoi se ai do të ishte shumë i lumtur ta priste atë në Shqipëri. Ai e ftoi Farage të vizitojë vendin për të parë bukuritë e Shqipërisë dhe për t'u njohur më mirë me kulturën dhe historinë e tij.
“Po pres që Nigel Farage të vijë. E kam ftuar publikisht dhe do të jem shumë i lumtur ta pres. Ky do të ishte një mundësi e shkëlqyer për të parë nga afër bukuritë e Shqipërisë dhe për ta bindur të konsiderojë vendin tonë si një destinacion për pushime,” shtoi ai.
Rama u shpreh se Shqipëria ka shumë për të ofruar, jo vetëm për politikanët, por edhe për turistët. Ai e përshkroi Shqipërinë si një nga vendet më të bukura të Evropës, për shkak të natyrës së paprekur dhe historisë që ende mbetet e ruajtur.
“Shqipëria nuk është thjesht e bukur; është më e bukura në Evropë sot. Nuk po them se është më e bukur se Italia, Greqia apo Spanja, por është më e bukura sepse ka ende shumë natyrë të paprekur dhe shumë nga Evropa Mesdhetare siç ishte dikur,” tha Kryeministri, duke shtuar se ky është një vend që do të mahniste çdo vizitor, përfshirë Nigel Farage.
Në fund të intervistës, Rama theksoi se pavarësisht sfidave politike dhe ekonomike që mund të ketë, Shqipëria është një vend i sigurt dhe mikpritës për ata që e vizitojnë.
Më poshtë intervista e përkthyer për ju nga DritareTv!
Gazetari: Mund të flasim edhe për numrin e shqiptarëve të burgosur në Mbretërinë e Bashkuar?
Rama: Nëse shikon burime AI, nuk ka një numër të jashtëzakonshëm që e dallon Shqipërinë nga të tjerët. Kjo është më shumë një perceptim i gabuar, pjesë e propagandës që u përdor për të bindur britanikët të largoheshin nga BE-ja, siç ishte premtimi se do të fitonin miliarda menjëherë për NHS-në. Sot, NHS nuk është më mirë se kur Britania ishte në BE dhe këto 350 miliardë nuk janë parë askund. Kështu që kjo histori me shqiptarët është një gënjeshtër tipike, krijuar për të shkaktuar frikë.
Gazetari: Po bisedat tuaja me politikanë britanikë? Keni folur me Nigel Farage për marrëveshje nëse ai do të bëhej kryeministër?
Rama: Po pres që Nigel të vijë. E kam ftuar publikisht. Ai tha se do të vijë dhe do të jem shumë i lumtur ta pres. Kjo është një mundësi e mirë për të takuar një njeri shumë të zgjuar, dhe gjithashtu për t’i treguar bukuritë e Shqipërisë dhe për ta bindur ta zgjedhë vendin tonë për pushimet e tij.
Gazetari: Do të dëshironit që Farage të pushonte në Shqipëri?
Rama: Po, sigurisht. Çdokush ka agjendën e vet. Është gjithmonë mirë të bisedosh me njerëz që vijnë nga rrugë të ndryshme të jetës.
Gazetari: Mendoni se ai mund të bëhet kryeministër i Mbretërisë së Bashkuar?
Rama: Nuk është puna ime të parashikoj. Këtë e vendosin britanikët. Britania është ende një demokraci dhe gjithçka do të ndodhë sipas vullnetit të popullit.
Gazetari: Sa për marrëveshjet për qendrat e kthimit me kryeministrin aktual, Sir Starmer, çfarë mendoni?
Rama: Le të kthehemi te gjërat reale, te jeta reale, te numrat realë, sepse sot, numrat dhe faktet po bëhen gjithnjë e më shumë çështje opinionesh, emocioni dhe besnikërie ndaj udhëheqësit që flet për to. Ka fakte të ndryshme, ashtu si ka dhe parti të ndryshme. Por le të harrojmë këtë për një moment dhe të shohim faktet e vërteta. Ne kemi bërë një punë të jashtëzakonshme së bashku me disa qeveri britanike, duke përfshirë edhe qeverinë aktuale dhe numri i shqiptarëve që hyjnë ilegalisht në Mbretërinë e Bashkuar ka rënë në një nivel të papërfillshëm. Pra, nuk ka fare diçka të tillë.
Nga ana tjetër, më lind një pyetje: nëse kjo do të jetë qasja e Mbretërisë së Bashkuar, ku dreqin do t’i gjejnë njerëzit që të ndërtojnë shtëpitë, ata që shërbejnë kafe, shoferët e taksive, shoferët e kamionëve dhe kështu me radhë? Kjo nuk është pyetje që duhet t’i përgjigjem unë, është pyetje për politikanët britanikë.
Gazetari: Ju e ftuat z.Farage të vizitonte Shqipërinë për pushime. Edhe ndërkohë që flasim, kemi dëgjues që kontaktojnë programin tonë duke thënë se Shqipëria është një vend i mrekullueshëm për të shkuar për pushime. Madje kemi dëgjuar referenca për Rivierën Shqiptare.
Rama: Shqipëria nuk është thjesht e bukur; është më e bukura sot në Evropë.jo. Nuk po them se është më e bukura sepse është më e bukur se Italia, Greqia apo Spanja dhe të gjitha këto vende të mrekullueshme, por është më e bukura sepse ka ende shumë natyrë të paprekur, të pashkatërruar dhe ka ende shumë nga Evropa Mesdhetare siç ishte dikur, kur jeta ishte më relaksuese. Kjo është arsyeja pse po them që është më e bukura, dhe jam i sigurt që, si konservator apo si të doni ta quani, z. Farage do t'i duket mahnitëse, sepse për të, e shkuara është më e mirë se e ardhmja. Pra, Shqipëria do ta ndihmojë edhe të përjetojë një shije të veçantë të Evropës./E.P-dritare.net
