Jetoi me plumb në zemër, ndërron jetë Gino Paoli, ikona e muzikës italiane
E Martë 24 Mars 2026, 13:01
Dritare.net
Këngëtari dhe kantautori i njohur italian Gino Paoli është ndarë nga jeta në moshën 91-vjeçare. Lajmi u konfirmua nga familja e artistit, e cila njoftoi se ai u shua gjatë natës, “në qetësi dhe i rrethuar nga dashuria e njerëzve të tij më të afërt”.
Paoli konsiderohet një nga figurat më të rëndësishme të muzikës së lehtë italiane dhe një prej themeluesve të ashtuquajturës shkollë gjenoveze, së bashku me emra të mëdhenj si Luigi Tenco, Fabrizio De André, Bruno Lauzi dhe Umberto Bindi. I lindur në Monfalcone më 23 shtator 1934, ai u rrit në Gjenovë, qytet me të cilin lidhi jetën dhe krijimtarinë e tij artistike.
Gjatë karrierës së tij shumëvjeçare, Gino Paoli i dhuroi muzikës italiane disa nga këngët më të njohura dhe më të dashura, mes tyre “Il cielo in una stanza”, “Senza fine”, “Sapore di sale”, “Che cosa c’è”, “La gatta”, “Una lunga storia d’amore” dhe “Quattro amici al bar”. Këto këngë e kthyen emrin e tij në një simbol të kantautorëve italianë dhe e futën përfundimisht në historinë e muzikës së vendit.
Jeta e artistit u shënua edhe nga periudha të vështira personale. Në vitin 1963, Paoli tentoi t’i jepte fund jetës duke qëlluar veten në kraharor, por mbijetoi; plumbi mbeti pranë zemrës së tij për pjesën tjetër të jetës, pasi heqja konsiderohej tepër e rrezikshme.
Pas një periudhe krize artistike dhe personale në fund të viteve ’60 dhe ’70, Paoli u rikthye fuqishëm në skenë në vitet ’80 me këngë si “Una lunga storia d’amore”, duke rifituar suksesin dhe vlerësimin e publikut. Përveç muzikës, ai pati edhe një angazhim publik, duke u zgjedhur deputet në radhët e PCI-së në vitin 1987.
Me ndarjen nga jeta të Gino Paolit, Italia humb një prej zërave dhe autorëve më të mëdhenj të saj, një artist që me këngët e tij shënoi epoka të tëra dhe la pas një trashëgimi të jashtëzakonshme në muzikën italiane./L.F-dritare.net
