Nuk i duam ata! Çfarë fshihet pas vendimit të Trump-it për të ndaluar udhëtimet nga 12 vende!
E Enjte 5 Qershor 2025, 11:11
Dritare.net
Presidenti i SHBA, Donald Trump, ka sqaruar më tej vendimin e tij për të ndaluar udhëtimet nga 12 vende drejt Shteteve të Bashkuara, përmes një videoje të publikuar në platformën e tij Truth Social.
Trump përmendi një ngjarje të fundit në Boulder, Kolorado, ku një burrë sulmoi një grup njerëzish që po mbanin një tubim në mbështetje të pengjeve izraelite, duke lënë të plagosur 12 persona. Ai tha se ky sulm “thekson rrezikun ekstrem që i kanoset vendit tonë nga hyrja e shtetasve të huaj që nuk janë kontrolluar siç duhet, si dhe nga ata që hyjnë përkohësisht dhe qëndrojnë në mënyrë të paligjshme pas skadimit të vizave.”
“Nuk i duam ata,” deklaroi Trump me tone të forta, duke shtuar se Shtetet e Bashkuara nuk mund të kenë emigracion të hapur nga asnjë vend që nuk mund të kontrollohet dhe skanohet në mënyrë të sigurt dhe të besueshme.
Ai theksoi se ashpërsia e masave të reja do të varet nga “rreziku që paraqet secili vend”, ndërsa shtoi se lista e vendeve të ndaluara mund të rishikohet në të ardhmen, në rast se bëhen përmirësime në sistemin e kontrollit të atyre shteteve.
Këto deklarata kanë ardhur menjëherë pas shpalljes zyrtare të ndalimit të udhëtimeve nga 12 shtete, një vendim që ka nxitur reagime të forta si brenda ashtu edhe jashtë Amerikës. Vendimi përbën një nga masat më të diskutuara të administratës Trump në mandatin e tij të dytë, duke rikthyer debatin për sigurinë, emigracionin dhe politikat e jashtme të SHBA./K.C/dritare.net
