Rikthimi i fuqishëm i Kinës në Britaninë e Madhe
E Martë 20 Janar 2026, 12:12
Dritare.net
Qeveria e Britanisë ka aprovuar aplikimin e Kinës për të ndërtuar një ambasadë të madhe në Londër, pavarësisht kundërshtimeve dhe shqetësimeve për spiunazh. Sipas zyrtarëve britanikë të sigurisë, janë hartuar një sërë masash mbrojtëse për të garantuar sigurinë kombëtare.
Vendimi i së martës vjen pas muajsh debate, ndërkohë që kryeministri britanik Sir Keir Starmer po përgatitet për një vizitë në Kinë, duke u bërë kryeministri i parë britanik që viziton vendin pas tetë vjetësh. Kina kishte kritikuar vonesat e shumta në miratimin e projektit, ndërsa kritikët paralajmëruan se ndërtesa mund të përdoret si qendër spiunazhi, pasi pranë saj kalojnë kabllo me të dhëna të ndjeshme nga City e Londrës.
Sekretari për komunitetet, Steve Reed, tha se as Ministria e Brendshme, as Ministria e Jashtme, nuk kishin ngritur shqetësime mbi kabllot, dhe vendimi është marrë sipas rekomandimeve të një inspektori të pavarur planifikimi, duke ndjekur një proces gjyqësor quasi-formal.
Ndërkohë, kritikët politikë e quajtën vendimin si një akt frikacak dhe shprehën shqetësim për dëshirën e Starmer për miratimin e Kinës. Zyrtarët britanikë e lidhin miratimin e ambasadës me mundësinë e zhvillimit të vizitës së kryeministrit në Pekin, ku ai synon të forcojë marrëdhëniet ekonomike dhe financiare me Kinën./L.F-dritare.net
