Valët e të nxehtit nuk prekin njësoj të gjithë njerëzit. Sipas ekspertëve të shëndetit, gratë janë biologjikisht dhe shoqërisht më të ekspozuara ndaj pasojave të temperaturave ekstreme, ndërsa ndryshimet klimatike po i bëjnë këto episode gjithnjë e më të shpeshta dhe më intensive.
Mjekja britanike Dr. Nighat Arif shpjegon se organizmi i grave prodhon më pak djersë dhe e nis procesin e djersitjes në temperatura më të larta krahasuar me burrat. Përveç kësaj, temperatura bazë e trupit dhe përqindja më e lartë e yndyrës trupore e bëjnë më të vështirë largimin e nxehtësisë. Ndikim të madh kanë edhe luhatjet hormonale gjatë ciklit menstrual, shtatzënisë, periudhës së ushqyerjes me gji, perimenopauzës dhe menopauzës, të cilat e vështirësojnë rregullimin natyror të temperaturës së trupit.
Sipas specialistëve, rreziku nuk lidhet vetëm me biologjinë. Faktorë si mosha, kujdesi për familjen, pabarazitë ekonomike dhe fakti që gratë jetojnë mesatarisht më gjatë, i bëjnë ato më të ndjeshme ndaj pasojave të vapës ekstreme.
Temperaturat e larta mund të përkeqësojnë ndjeshëm simptomat gjatë menstruacioneve. Lodhja, marramendja, pagjumësia, ankthi dhe dhimbjet bëhen më të forta, ndërsa humbja e hekurit gjatë ciklit e vë sistemin kardiovaskular nën presion edhe më të madh.
Edhe gratë në menopauzë apo perimenopauzë raportojnë përkeqësim të afsheve të nxehta dhe djersitjeve gjatë natës, ndërsa shtatzënia rrit më tej ndjeshmërinë ndaj stresit termik. Studimet tregojnë se ekspozimi ndaj vapës gjatë shtatzënisë mund të rrisë rrezikun për komplikacione si për nënën, ashtu edhe për foshnjën.
Ekspertët paralajmërojnë se nxehtësia ekstreme rrit ngarkesën mbi zemrën dhe sistemin kardiovaskular, duke shtuar rrezikun për lodhje nga nxehtësia, rënie të tensionit, goditje nga nxehtësia dhe, në raste të rënda, infarkt. Për këtë arsye këshillohet konsumimi i sa më shumë lëngjeve, shmangia e ekspozimit në orët më të nxehta të ditës, përdorimi i mjeteve ftohëse dhe njohja e hershme e simptomave të lodhjes nga nxehtësia./BBC
