Qumështi i mbretëreshës është mrekulli biologjike, nga ndryshon nga ai i bletës punëtore!
E Mërkurë 3 Dhjetor 2025, 21:09
Dritare.net
Në emisionin “Shqip” të Rudina Xhungës, apiterapeuti dhe bletari me 55 vite eksperiencë, Bedri Statovci, shpjegoi një nga misteret më të mëdha të bletarisë: dallimin mes qumështit të bletës dhe qumështit të mbretëreshës.
“E njëjta larvë, dy jetë krejt të ndryshme”
Statovci tha se larva e bletës, në ditën zero, është identike, por jeta e saj ndryshon për shkak të ushqimit:
“E njëjta vezë, nëse ushqehet me qumësht mbretëreshe, jeton gjashtë vjet. Po ajo vezë, nëse ushqehet me ushqimin e bletës punëtore, jeton 30–35 ditë.”
Ky është, sipas tij, sekreti më i madh i bletës.
Çfarë është qumështi i bletës?
Është ushqimi i zakonshëm që bletët punëtore prodhojnë për larvat gjatë tre ditëve të para të jetës. Ka vlera ushqyese, por jo efekte transformuese.
Çfarë është qumështi i mbretëreshës?
Është substanca më e pasur që prodhon bleta, ushqimi i larvës që do të bëhet mbretëreshë.
Statovci theksoi:
“Qumështi i mbretëreshës është eliksiri i bletës. Ai rigjeneron, rrit imunitetin, ndikon në tru, në qelizë dhe në plakje.”
Dilema më e madhe: Si ta dimë nëse ajo që blejmë është qumështi i mbretëreshës?
Statovci u tregua i sinqertë:
“Nuk ka mënyrë ta dish. Shkon me besim. Vetëm pak njerëz në Shqipëri e prodhojnë seriozisht.”
Ai përmendi disa prodhues të ndershëm në Shqipëri, por vuri alarmin se tregu është plot falsifikime, sepse qumështi i mbretëreshës ka vlerë të lartë dhe jetë të shkurtër ruajtjeje.
Pse ka kaq vlerë?
Sepse:
• rrit imunitetin
• rigjeneron qelizat
• ndihmon trurin
• lufton plakjen
• përdoret në mjekësi alternative për probleme ku mjekësia konvencionale nuk ndërhyn dot
Statovci: “Është një botë e pahulumtuar”
Ai e mbylli me një thirrje për më shumë shkencë dhe kontroll:
“Qumështi i mbretëreshës është një farmaci e natyrës. Por tregu duhet pastruar, analizat duhet bërë, dhe shteti duhet të marrë përgjegjësi.”/dritare.net
