Revista e njohur e udhëtimeve Wanderlust: Shqipëria e zbuluar përmes përvojave autentike të komuniteteve lokale
E Martë 12 Gusht 2025, 16:04
Dritare.net
Revista e njohur e udhëtimeve Wanderlust hedh një vështrim të veçantë mbi Shqipërinë, duke e zbuluar përmes përvojave autentike që ofrojnë komunitetet lokale. Artikulli që dritare.net e sjell për ju më poshtë të përshtatur në shqip, udhëton nga gjurmimi i natyrës së egër në parqe kombëtare e laguna, te qytetet historike dhe zonat e mbrojtura, duke përfshirë jetën baritore në male, mikpritjen e shtëpive tradicionale dhe ritualin e lashtë të leximit të filxhanit të kafesë turke, një udhëtim që shpalos fytyrat e shumta të vendit tonë përtej plazheve të njohura.
Ndryshimi në Shqipëri dhe sfida e turizmit
Shqipëria po përballet me popullaritetin e ri, pas dekadash izolimi gjatë komunizmit. Vetëm në vitin 2023, vendin e vizituan mbi 10 milionë turistë, trefishi i popullsisë – shumica për pushime të lira në bregdetin Adriatik. Ky fluks ngre shqetësime për dëmtimin e mjedisit dhe komuniteteve bregdetare. Qeveria po orienton turizmin drejt përvojave komunitare, natyrës së mbrojtur dhe trashëgimisë kulturore.
Tirana, nga e kaluara komuniste te kryeqyteti kreativ
Në kohën e diktaturës së Enver Hoxhës, Shqipëria shkatërroi objekte fetare dhe imponoi ateizmin. Sot, Tirana ka dalë nga grija e ndërtesave sovjetike falë iniciativave të kryeministrit artist Edi Rama. Bunkeret janë kthyer në muze si Bunk’Art, ndërsa Piramida e Tiranës është shndërruar nga monument diktatorial në hapësirë publike moderne. Kryeqyteti shfaq arkitekturë të gjallë, ngjyra dhe frymë të re.
Divjakë-Karavasta, natyra e mbrojtur dhe mikpritja lokale
Parku Kombëtar Divjakë-Karavasta është strehë e pelikaneve dalmatë dhe mbi 260 llojeve të tjera shpendësh. Ka qendra edukimi, patrullime kundër gjuetisë dhe rehabilitim të shpendëve të egër. Një udhëtim me biçikleta elektrike çon tek familja Rrasa, ku mikpritja shoqërohet me gatime shtëpie, verë vendase dhe lexim filxhani. Arti i gurit dhe vetëprodhimi ushqimor pasqyrojnë jetën tradicionale.
Vlora, bukuria natyrore dhe sfidat e zhvillimit
Bregu i Vlorës, pjesë e “Rivierës Shqiptare”, tërheq masa turistësh, por ndërtesat e larta dhe aeroporti i planifikuar ngrejnë shqetësime për ndikimin mjedisor. Parku Detar Karaburun-Sazan ruan koralet, livadhet detare, breshkat, delfinët dhe fokën e rrallë mesdhetare. Ekskursioni përfshin shpellën e Haxhi Aliut dhe sitin arkeologjik të Orikumit. Vizita te një çift barinjsh ofron raki, gatime tradicionale dhe muzikë me fyell, duke treguar një mënyrë jetese që i reziston kohës.
Berati, qyteti i një mijë dritareve
Berati, i mbrojtur nga UNESCO, ruan arkitekturën osmane të lagjes Mangalem dhe kalanë e shek. XIII. Historia e tij përfshin periudha greke, ilire, romake dhe bizantine. Xhamitë dhe kishat pasqyrojnë bashkëjetesën e besimeve. Sheshi para shtëpive shërben ende si vend socializimi për banorët. Pamja e qytetit nga lumi Osum e justifikon plotësisht nofkën “Qyteti i një mijë dritareve”.
Nga Tirana moderne te natyra e Divjakës, nga kontrastet e Vlorës te trashëgimia e Beratit, udhëtimi tregon një Shqipëri në ndryshim, ku përvojat komunitare ofrojnë një pasqyrë të vërtetë të jetës vendase – ndonjëherë madje edhe të parashikuar në fund të një filxhani kafeje.
