Gjykata në Paris dënon 10 persona për bullizim ndaj Brigitte Macron
E Hënë 5 Janar 2026, 12:12
Dritare.net
Dhjetë persona janë shpallur fajtorë nga një gjykatë në Paris për bullizim kibernetik ndaj Brigitte Macron, bashkëshortes së presidentit francez Emmanuel Macron. Të pandehurit u akuzuan për përhapje pretendimesh të rreme lidhur me gjininë dhe seksualitetin e saj, si edhe për komente keqdashëse mbi diferencën 24-vjeçare të moshës mes çiftit presidencial.
Shumica e të dënuarve morën dënime me burg me kusht deri në tetë muaj, ndërsa një prej tyre u dënua me burgim të menjëhershëm për shkak se nuk u paraqit në seancën gjyqësore. Vendimi i plotë i gjykatës pritet ende të publikohet.
Pretendimet konspirative se Brigitte Macron është një grua transgjinore kanë qarkulluar që prej vitit 2017, kur Emmanuel Macron u zgjodh për herë të parë president i Francës.
Vendimi i së hënës vjen në një kohë kur çifti Macron po ndjek gjithashtu një padi për shpifje në Shtetet e Bashkuara kundër influencueses së krahut të djathtë Candace Owens, e cila ka përsëritur publikisht teori konspirative mbi gjininë e zonjës Macron. Sipas padisë, Owens ka injoruar provat që hedhin poshtë këto pretendime dhe ka promovuar teori të pavërteta.
Owens i ka përsëritur këto akuza në podcastin dhe rrjetet e saj sociale, duke deklaruar në mars 2024 se do të vinte në lojë “të gjithë reputacionin e saj profesional” mbi bindjen se Brigitte Macron “është në fakt burrë”.
Brigitte Macron është njohur me bashkëshortin e saj aktual kur ajo ishte mësuese në shkollën e mesme ku studionte Emmanuel Macron. Çifti u martua në vitin 2007, kur ai ishte 29 vjeç dhe ajo në mesin e të pesëdhjetave./L.F-dritare.net
