Tensione të forta: Trump sulmon Spanjën, Sánchez: Nuk duam luftë!
E Mërkurë 4 Mars 2026, 10:10
Dritare.net
Kryeministri i Spanjës, Pedro Sánchez, i është kundërpërgjigjur ashpër kërcënimit të presidentit amerikan Donald Trump për ndërprerjen e tregtisë me Spanjën, duke deklaruar se qeveria e tij kundërshton luftën dhe “dështimin e rendit juridik ndërkombëtar”.
Në një fjalim televiziv 10-minutësh nga rezidenca qeveritare La Moncloa, Sánchez reflektoi mbi luftërat në Ukrainë dhe Gaza, si dhe mbi pushtimin e Irakut në vitin 2003, duke theksuar se qëndrimi i qeverisë së tij “mund të përmblidhet me katër fjalë: Jo luftës”.
Kërcënimi për embargo
Trump kërcënoi me vendosjen e një embargoje të plotë tregtare ndaj Spanjës, pasi Madridi refuzoi t’i lejojë SHBA-së përdorimin e bazave të përbashkëta ushtarake në Morón dhe Rota për sulme ndaj Iranit.
“Spanja ka qenë e tmerrshme. Do ta ndërpresim gjithë tregtinë me Spanjën. Nuk duam të kemi asgjë me Spanjën,” deklaroi Trump gjatë një takimi me kancelarin gjerman Friedrich Merz.
Merz theksoi më vonë se i kishte bërë të qartë presidentit amerikan se nuk mund të arrihej një marrëveshje e veçantë me Gjermaninë apo me gjithë Evropën, duke përjashtuar Spanjën.
Debati për NATO-n dhe buxhetin e mbrojtjes
Trump e ka akuzuar gjithashtu Spanjën se është një “partnere e keqe” në NATO, për shkak se nuk ka rritur shpenzimet e mbrojtjes në nivelin 5% të Prodhimit të Brendshëm Bruto (PBB), siç kërkohet nga objektivat e reja të aleancës.
“Një paligjshmëri nuk zgjidhet me një tjetër”
Në fjalimin e tij, Sánchez deklaroi se qeveria po studion masa ekonomike për të zbutur ndikimin e konfliktit te qytetarët spanjollë. Ai theksoi se një “paligjshmëri” nuk mund të përballet me një tjetër, duke iu referuar situatës në Lindjen e Mesme.
Kryeministri spanjoll e krahasoi qëndrimin aktual me pozicionin e tij ndaj luftës në Ukrainë dhe konfliktit në Gaza, ku ai ka qenë kritik i zëshëm ndaj reagimit ushtarak të Izraelit pas sulmeve të Hamasit në vitin 2023.
Duke kujtuar pushtimin e Irakut në vitin 2003, që sipas tij dështoi të arrinte objektivat dhe përkeqësoi jetën e njerëzve të zakonshëm, Sánchez paralajmëroi se sulmet ndaj Iranit mund të kenë pasoja të ngjashme ekonomike për miliona njerëz.
“Është e papranueshme që disa presidentë të përdorin mjegullën e luftës për të mbuluar dështimet e tyre,” tha ai, duke shtuar: “Pyetja nuk është nëse jemi në anën e ajatollahëve – askush nuk është. Pyetja është nëse jemi pro paqes dhe të drejtës ndërkombëtare.”/L.F-dritare.net
