Në një intervistë emocionuese nga Como e Italisë, në vitin 1999 këngëtarja e mirënjohur me origjinë shqiptare, Ana Oxa, foli hapur për gazetaren Rudina Xhunga, duke ndarë detaje të panjohura më parë mbi identitetin e saj, lidhjen e fortë me rrënjët, dhe qëndrimin e saj të palëkundur gjatë luftës në Kosovë. Duke nisur bisedën me arsyen e pranimit pa hezitim të ftesës, Oxa theksoi se origjina e saj shqiptare është një pjesë integrale e qenies së saj.
"Im atë Qazimi ka lindur në Krujë," tha ajo, duke iu referuar babait të saj. Ajo tregoi se si paraardhësit e saj kishin ardhur nga Kosova në Krujë, duke formuar kështu një urë lidhëse mes dy trevave shqiptare. Me një pasion të zjarrtë, ajo hodhi poshtë çdo aludim se e ka pranuar me vështirësi origjinën, duke deklaruar: "Kush harron origjinën e tij, ose ka turp, ose nuk ka personalitet. Unë nuk mund të fsheh origjinën, sepse kjo do të thotë të fshehësh prindërit e tu."
Kujtimet për të atin ishin plot me vlera të thella njerëzore si dinjiteti, ndershmëria dhe përkushtimi ndaj familjes. Këto vlera, sipas saj, e kanë formuar si njeri dhe artiste, duke i dhënë forcën të përballojë sfidat pa e harruar kurrë identitetin e saj.
Rikthimi i saj në Shqipëri përshkruhet si një udhëtim emocional, kulmi i të cilit ishte takimi me të afërmit e saj pas një kërkimi të gjatë. Përshkrimi i futjes në shtëpinë e të atit në Krujë ishte prekës:
"Isha e bindur se derën do të ma hapte ai, babai im. E kisha humbur çdo lloj kontakti me realitetin, e dehur nga aroma e një vendi tjetër." Një nga pikat më kulmore të intervistës ishte diskutimi mbi luftën në Kosovë. Oxa rrëfeu se vizita e saj në Prishtinë gjatë krishtlindjeve i kishte hapur sytë përballë tmerrit që po ndodhte. Ajo e krahasoi situatën me një holokaust modern, duke dëshmuar për ndarjen racore dhe shtypjen sistematike të shqiptarëve. "Unë në Kosovë pashë holokaustin," tha ajo me forcë, duke përshkruar një shoqëri ku inteligjenca dhe privilegjet ishin të rezervuara për serbët, ndërsa shqiptarët ishin të destinuar për nënshtrim. Ky realitet tronditës e shtyu të fliste hapur në emisionin e njohur italian "Porta a Porta", duke u bërë një zë i fuqishëm për kauzën shqiptare. Ajo e konsideroi këtë një detyrim njerëzor, përtej çdo interesi personal apo profesional. Ajo kritikoi ashpër politikanët dhe diplomatët, veçanërisht ambasadorin serb, për përpjekjet e tyre për të shtrembëruar të vërtetën.
Për të, Milosheviçi nuk ishte vetëm një individ, por një kriminel në krye të një sistemi kriminal, i cili duhej të përballej me drejtësinë bashkë me të gjithë ndjekësit e tij./dritare.net
