Balla i kthehet Berishës: Hiq dorë nga balta, Shqipëria i ka përmbushur të gjitha detyrimet
E Enjte 23 Prill 2026, 11:11
Dritare.net
Taulant Balla iu përgjigj akuzave të Sali Berishës duke deklaruar se Shqipëria ka përmbushur detyrimet në kuadër të procesit të anëtarësimit në Bashkimi Europian.
Ai theksoi se raporti vjetor i qeverisë për integrimin është dorëzuar në Kuvend dhe se, sipas institucioneve europiane si Komisioni Europian, Parlamenti Europian dhe Këshilli i Europës, vendi ka përmbushur piketat e ndërmjetme të procesit.
Në fund, ai i bëri thirrje opozitës të ndalë akuzat dhe të bashkëpunojë për avancimin e procesit të integrimit europian.
“Ka mbërritur raporti vjetor i qeverisë për rrugën drejt BE. Ajo që duhet tua themi me krenari shqiptarëve, është fakt nga KE, PE dhe KiE , se Shqipëria ka përmbushur detyrimet që vijnë nga procesi i anëtarësimit të Shqipërisë sonë të përbashkët në BE. Të gjitha piketat e ndërmjetme sipas raportit të KE janë përmbushur, ka një procedurë që të gjithë e dimë që nga KE kalon të Këshilli dhe nga Këshilli të vendet anëtare. Brenda fillimit të qershorit, sikurse u komunikua nga Kos dhe Kallas, se pritshmëria e Shqipërisë për të përmbyllur procesin e anëtarësimit brenda 2030-ës është realiste, madje po citoj Kallas që tha se Shqipëria bashkë me malin e zi duhet të bëhen gati për të marrë pjesë në zgjedhjet europiane të vitit 2029. Ky është fakt, sa i përket gjithë këtyre emaileve që the, habereve që the. Hiqni dorë nga kjo baltë që hidhni kundër Shqipërisë, nuk e keni Shqipërinë vend armik. Nuk ju zgjedhim dot, por është momenti të punojmë bashkë. Nuk iu bën nder të shani nga mëngjesi në darkë”, tha Balla./L.F-dritare.net
