NATO dënon Iranin pas raketës drejt hapësirës ajrore të Turqisë
E Mërkurë 4 Mars 2026, 14:02
Dritare.net
NATO ka dënuar ashpër Iranin pasi një raketë balistike e lëshuar nga territori iranian, që po drejtohej drejt hapësirës ajrore turke, u rrëzua nga sistemet e mbrojtjes ajrore të aleancës në Mesdheun lindor.
Zëdhënësja e NATO-s, Allison Hart, deklaroi se aleanca “e dënon shënjestrimin e Turqisë nga Irani” dhe theksoi se NATO qëndron “fort me të gjithë aleatët, përfshirë Turqinë, ndërsa Irani vazhdon sulmet e tij të pamatura në rajon”. Ajo shtoi se qëndrimi i parandalimit dhe mbrojtjes së NATO-s mbetet i fortë në të gjitha fushat, përfshirë mbrojtjen ajrore dhe atë nga raketat.
Rrëzimi i raketës mbi Mesdheun lindor
Sipas Ministrisë turke të Mbrojtjes, raketa balistike kishte kaluar mbi Siri dhe Irak përpara se të drejtohej drejt hapësirës ajrore të Turqisë. Ajo u neutralizua nga sistemet e mbrojtjes ajrore dhe raketore të NATO-s të vendosura në Mesdheun lindor.
Autoritetet turke konfirmuan se nuk pati viktima apo të lënduar nga incidenti. Megjithatë, mbetjet e raketës interceptuese ranë në distriktin Dörtyol të provincës Hatay, në juglindje të vendit.
Ky incident shënon herën e parë që Turqia – anëtare e NATO-s dhe fqinje veriperëndimore e Iranit – përfshihet drejtpërdrejt në konfliktin në zgjerim në rajon.
Paralajmërimi i Ankarasë
Në deklaratën e saj, Ministria turke e Mbrojtjes paralajmëroi të gjitha palët që të përmbahen nga veprime që mund të çojnë në përshkallëzim të mëtejshëm të konfliktit.
“Do të vazhdojmë të konsultohemi me NATO-n dhe aleatët tanë të tjerë. Të gjitha hapat e nevojshëm për të mbrojtur territorin dhe hapësirën tonë ajrore do të ndërmerren me vendosmëri dhe pa hezitim,” thuhet në reagim. Turqia gjithashtu theksoi se rezervon të drejtën për t’iu përgjigjur çdo veprimi armiqësor kundër saj.
Dy deklarata të tjera fillestare nga zyrtarë të lartë turq nuk përmendën Nenin 4 të Traktatit të NATO-s, i cili parashikon konsultime mes aleatëve kur integriteti territorial, pavarësia politike apo siguria e një shteti anëtar konsiderohet e kërcënuar.
Zhvillimi vjen në një moment tensionesh të larta në rajon, ndërsa konfliktet dhe shkëmbimet e sulmeve po rrisin shqetësimet për një përhapje më të gjerë të përplasjes në Lindjen e Mesme.
/L.F-dritare.net
