PPE miratoi rezolutën e PD-së. Reagon Rama
E Mërkurë 30 Prill 2025, 20:08
Dritare.net
Kryeministri Edi Rama ka reaguar pas miratimit të rezolutës së Partisë Demokratike nga Partitë Popullore Evropiane. Përmes një postimi në rrjetin social X, Rama shkruan se kjo rezulutë i paraprin alibisë së Partisë Demokratike në rast se humbasin më 11 maj.
“Alibia e humbjes paska filluar në gjirin e PPE, ku salla bosh e partive simotra paska votuar unanimisht fletë-rrufenë e Kënetës Madhështore për humbjen e lirisë së zgjedhjeve. Një tekst kua-kua-kuash që tregon se iluzioni i ëmbël i Latif magjistarit, po ia le vendin ndjesisë së hidhur të humbjes madhështore të 11 majit”-thuhet në reagimin e Ramës.
Në rezolutën e PD-së thuhet se partitë e djathta shprehin shqetësimin për situatën politike në prag të zgjedhjeve që lidhet me keqpërdorimin e burimeve shtetërore, blerjen e votës dhe shkeljen e fshehtësisë. Po ashtu, në rezolutë thuhet se PPE është e shqetësuar për mungesën e vazhdueshme të progresit në zbatimin e rekomandimeve kyçe të OSBE/ODIHR për reformën zgjedhore.
Rezoluta i bën thirrje BE-së, OSBE-së dhe Këshillit të Europës që të kërkojnë ndërprerjen e blerjes së votës dhe abuzimit me fondet publike; Dërgojnë vëzhgues shtesë në bashkitë me risk të lartë; Dokumentojnë publikisht dhe të denoncojnë shkeljet zgjedhore.; Zbatojnë mekanizma kushtëzues në procesin e integrimit në BE në rast se shkeljet vazhdojnë./K.C/dritare.net
