Rrëfimi i padëgjuar i Luftës së Kosovës! Si e shpëtuan 'Deltat' shqiptare teknologjinë sekrete të NATO-s!
E Premte 12 Dhjetor 2025, 17:05
Dritare.net
Në një rrëfim ekskluziv për emisionin Shqip nga Rudina Xhunga, Dritare TV, ish-shefi i zbulimit të Batalionit të Forcave Speciale të Shqipërisë, Maksim Jaupi ka zbardhur për herë të parë një nga operacionet më sekrete dhe të rrezikshme të kryera gjatë Luftës së Kosovës në vitin 1999.
Historia, e cila ka mbetur në hije për më shumë se dy dekada, hedh dritë mbi guximin e pashoq të ushtarakëve shqiptarë, bashkëpunimin e ngushtë me forcat elitë amerikane 'Delta Force' dhe paradoksin e hidhur të trajtimit të heronjve nga shteti shqiptar. Ngjarja zë fill në pranverën e vitit 1999, kur Shqipëria ishte kthyer në një prapavijë strategjike për operacionet e NATO-s dhe UÇK-së.
Batalioni i Forcave Speciale, i krijuar vetëm një vit më parë nën kujdesin e NATO-s dhe Turqisë, ishte dislokuar në vijën kufitare pranë Kukësit. Jaupi tregon se si ky batalioni i përbërë nga djemtë më të mirë të zgjedhur nga e gjithë Shqipëria, kishte krijuar një bashkëpunim të ngushtë operativ me forcat speciale amerikane. Pika kulmore e dëshmisë është rrëzimi i një objekti fluturues në territorin serb, disa qindra metra larg kufirit shqiptar. Në atë kohë, asnjëri nuk e dinte saktësisht se çfarë ishte, por dyshimet e para ishin për një pilot të NATO-s të rrëzuar.
Jaupi, duke marrë iniciativën dhe pa pritur urdhra që mund të vonoheshin për shkak të mungesës së komunikimit, organizoi një grup prej gjashtë efektivësh për të hyrë në zonën e minuar dhe të kontrolluar nga snajperat serbë.
Objektivi ishte i qartë, të shpëtonin pilotin ose të mos lejonin që teknologjia të binte në duart e ushtrisë jugosllave dhe aleatëve të tyre rusë. Operacioni u krye në mes të ditës, nën një rrezik ekstrem. Kur ekipi arriti te objekti, zbuluan se nuk ishte një avion me pilot, por një avion spiunazhi pa pilot (UAV) i llojit Predator, një teknologji e vitit 1996 që po testohej për herë të parë në luftë.
Jaupi dhe ekipi i tij, nën breshërinë e artilerisë serbe, arritën të çmontonin dhe të merrnin pajisjet kyçe, kamerën, kutinë e regjistrimit dhe antenën transmetuese. Këto pajisje përmbanin informacione jetike për pozicionet serbe, të cilat më pas u përdorën nga NATO për bombardimet preçize që çuan në kapitullimin e Millosheviçit. Por, ana më dramatike e këtij rrëfimi nuk është vetëm akti heroik në fushën e betejës, por ajo që ndodhi pas kthimit.
Ndërsa amerikanët dhe komanda e NATO-s e pritën me entuziazëm suksesin e operacionit, duke e konsideruar një akt që shpëtoi sekretet ushtarake nga rënia në dorë të Rusisë, reagimi i strukturave drejtuese të ushtrisë shqiptare ishte krejt i kundërt. Jaupi tregon me dhimbje se si, në vend të një dekorate, atij iu komunikua shkarkimi nga detyra dhe lirimi nga ushtria për thyerje të disiplinës dhe veprim pa urdhër, një vendim i marrë nga Ministri i Mbrojtjes i asaj kohe.
Jaupi, i cili sot jeton në SHBA dhe punon në sektorin civil, shpreh keqardhje për faktin se shumë nga ata djem të shkëlqyer u lanë në harresë, ndërsa thekson se pavarësisht trajtimit, dashuria për atdheun. Historia e avionit Predator dhe e gjashtë komandoseve shqiptarë mbetet një dëshmi e gjallë se liria e Kosovës ka në themelet e saj edhe gjakun dhe djersën e heshtur të ushtarakëve të Shqipërisë./dritare.net
