Sot 80-vjeç, Trump rikthen debatin: Deri kur duhet të punohet?
Sunday 14 June 2026, 16:04
Dritare.net
Ndërsa Presidenti i SHBA-së, Donald Trump, feston 80-vjetorin, vëmendja është rikthyer te një fenomen në rritje në Amerikë: njerëzit që vazhdojnë të punojnë edhe në dekadën e tetë, të nëntë apo madje të dhjetë të jetës së tyre.
Sipas të dhënave të fundit, rreth 19% e amerikanëve mbi 65 vjeç janë ende aktivë në tregun e punës, një shifër katër herë më e lartë se në vitet 1980. Mes tyre janë politikanë, drejtues kompanish, mjekë dhe avokatë.
Një prej tyre është Arthur Rose, një mjek nga Miçigani, i cili doli në pension vetëm pak muaj më parë, në ditëlindjen e tij të 95-të, pas më shumë se 65 vitesh në profesion. Ai thotë se vazhdoi të punonte sepse e donte profesionin dhe ndiente se pacientët e tij kishin ende nevojë për të.
Po aq aktive është edhe Harriet Newman Cohen, një avokate 93-vjeçare, e cila vazhdon të paraqitet në gjykatë dhe së fundmi ka botuar edhe kujtimet e saj. Sipas saj, puna e ka mbajtur energjike, aktive dhe të lidhur me jetën.
Ekspertët e plakjes thonë se njerëzit jetojnë më gjatë falë kujdesit më të mirë shëndetësor, ndërsa shumë prej tyre zgjedhin të punojnë jo vetëm për arsye financiare, por edhe për të ruajtur kontaktet shoqërore dhe ndjenjën e qëllimit në jetë.
Megjithatë, mosha e avancuar sjell edhe debate, sidomos kur bëhet fjalë për poste me përgjegjësi të lartë. Donald Trump, i cili mbush 80 vjeç, është një nga liderët më të moshuar në botë. Kritikët kanë ngritur shqetësime për ndikimin e moshës në performancën e tij, ndërsa mjeku personal i presidentit ka deklaruar se Trump gëzon "shëndet të shkëlqyer" dhe vazhdon të përballojë një axhendë intensive pune.
Studiuesit theksojnë se sekreti i jetëgjatësisë nuk lidhet vetëm me gjenetikën, por edhe me gjumin e mjaftueshëm, ushqimin e shëndetshëm, aktivitetin fizik, aksesin në kujdes shëndetësor dhe ruajtjen e një qëllimi të fortë në jetë.
Për shumë amerikanë në moshë të thyer, puna nuk është më thjesht një burim të ardhurash, por një mënyrë për të qëndruar aktivë dhe të angazhuar me botën përreth./L.F-dritare.net
