Tragjedi në Teksas: 51 të vdekur nga përmbytjet, mes tyre 15 fëmijë
E Diel 6 Korrik 2025, 09:09
Dritare.net
Qindra ekipe shpëtimi janë mobilizuar në Teksasin qendror për të kërkuar persona të zhdukur, pasi përmbytje të befasishme kanë marrë jetën e 51 personave, përfshirë 15 fëmijë. Zona më e goditur është Kerr County, ku janë raportuar 43 viktima dhe 27 fëmijë të zhdukur nga një kamp veror i krishterë për fëmijë, i quajtur Camp Mystic, i vendosur përgjatë lumit Guadalupe.
Sherifi i Kerr County, Larry Leitha, ka deklaruar se puna për kërkimin do të vazhdojë derisa të gjithë të jenë gjetur. Viktima janë raportuar edhe në qarqe të tjera si Travis dhe Tom Green. Rreth 850 persona janë shpëtuar deri tani, ndërkohë që paralajmërimet për përmbytje të tjera mbeten në fuqi për fundjavën.
Guvernatori i Teksasit, Greg Abbott, njoftoi të shtunën se ka nënshkruar një zgjerim të shpalljes së gjendjes së fatkeqësisë natyrore për të ndihmuar operacionet e kërkimit. Ai tha se autoritetet do të jenë të pamëshirshme në përpjekjet për të gjetur “çdo person të prekur nga kjo ngjarje”, dhe se puna do të ndalet vetëm kur gjithçka të përfundojë.
Zyrtarët theksuan se operacioni mbetet mision shpëtimi, jo rikuperimi, dhe ekipet po kërkojnë përgjatë lumit Guadalupe për persona që mund të jenë marrë nga vërshimi i ujit.
Presidenti amerikan Donald Trump tha se administrata e tij po punon nga afër me autoritetet lokale për t’iu përgjigjur situatës.
Kampi Camp Mystic, ku ndodhen shumica e fëmijëve të zhdukur (shumë prej tyre nën moshën 12 vjeç), është përmbytur kur lumi u rrit me më shumë se 8 metra brenda më pak se një ore, gjatë natës së të premtes. Shumë vajza ishin në gjumë kur ndodhi përmbytja. Pamjet nga kampi tregojnë dhoma të shkatërruara, me krevate, lodra dhe batanije të mbuluara nga balta.
Kampi u ka dërguar email prindërve të rreth 750 fëmijëve, duke u thënë se nëse nuk janë kontaktuar personalisht, atëherë fëmija i tyre është i sigurt.
Ndërkohë, shërbimi kombëtar meteorologjik ka paralajmëruar reshje të tjera të dendura këtë fundjavë në zonën qendrore të Teksasit./K.C/dritare.net
