Nga Lufta e Ftohtë te Pablo Escobar, a është kodi Mors më i sigurt se emaili? Flet ish-radisti
E Hënë 20 Tetor 2025, 19:07
Dritare.net
Në një epokë të dominuar nga interneti, satelitët dhe komunikimet dixhitale, a ka ende vend për një teknologji si kodi Mors? Ish-radisti Pavli Dako beson se po. Duke reflektuar mbi përgatitjen e tyre për një luftë që fatmirësisht nuk ndodhi, ai krahason sistemin e tyre me teknologjitë moderne.
'Ti çon me email sot, por emailin e patë se ç'ndodhi,' thotë ai, duke iu referuar cenueshmërisë së sistemeve dixhitale. Sistemi i tyre kishte shtresa të shumta sigurie, përfshirë deri në shtatë valë rezervë për çdo komunikim.
Për të provuar se kjo metodë nuk është e vjetëruar, ai sjell një shembull befasues: 'Edhe Escobar, kur bleu nëndetëset nga rusët për të transportuar drogën, ka përdorur kodin Mors deri në vitin 2000.' Ky fakt tregon se në situata ku siguria dhe fshehtësia janë parësore, metodat e vjetra dhe të provuara mund të jenë ende superiore.
Pavli Dako bën një thirrje të fortë.
'Duke ditur me kë ke të bësh, me çfarë ushtrie ke të bësh si Rusia, është gjithmonë e rrezikshme,' thotë ai, duke argumentuar se përgatitja për skenarë të mundshëm duhet të nisë nga rehabilitimi i kësaj infrastrukture. 'Këto tunele duhet të pastrohen'.
Ai ndan edhe disa detaje finale, siç ishte investimi i madh në vitet '80 për t'i veshur muret me pllaka PVC për izolim, apo përdorimi i valëve speciale të kuarcit, të cilat ofronin një lidhje tepër precize dhe të menjëhershme, sidomos për aviacionin. Biseda mbyllet me një ndjenjë keqardhjeje për indiferencën.
'Ka neglizhencë të madhe,' përfundon ai, 'dhe popullsia ushqehet nga qeveria. Nëse nuk edukohesh me frymën e patriotizmit, gjithçka është kot'./dritare.net
