Gjithçka që dihet nga gabitja spektakolare në Luvër
E Hënë 20 Tetor 2025, 15:03
Dritare.net
Parisi është tronditur nga një grabitje e guximshme në Muzeun e Luvrit, ku një grup prej katër personash të maskuar vodhën stoli të çmuara mbretërore me vlerë të paçmuar historike dhe kulturore. Ngjarja ndodhi të dielën, rreth orës 09:30 të mëngjesit, vetëm pak minuta pas hapjes së muzeut.
Sipas raportimeve të policisë franceze, hajdutët përdorën një vinç mekanik të montuar mbi automjet për të arritur në ballkonin e Galerisë së Apolonit, që ndodhet mbi brigjet e lumit Seine. Dy prej tyre prenë xhamat e dritares me një disk elektrik prerës, hynë brenda dhe kërcënuan rojat e sigurisë, duke detyruar stafin të evakuonte vizitorët.
Në më pak se dhjetë minuta, grabitësit thyen dy vitrina xhami dhe morën tetë objekte bizhuterish të shekullit XIX, përfshirë:
Kurorën dhe broshet e Perandoreshës Eugenie, bashkëshortja e Napoleonit III;
Gjerdanin dhe vathët me smerald të Empress Marie Louise;
Një komplet safiri të mbretëreshave Marie-Amelie dhe Hortense;
Një broshe relikuar të njohur si “Reliquary Brooch”.
Dy sende, përfshirë kurorën e Eugenie-s, u gjetën më vonë pranë muzeut, të hedhura gjatë arratisjes në skuterë, mjeti me të cilin autorët u zhdukën në drejtim të panjohur.
Hetimet po drejtohen nga 60 oficerë të specializuar, dhe sipas prokurorisë franceze, dyshohet se pas ngjarjes qëndron një organizatë kriminale ndërkombëtare. Pamjet e kamerave të sigurisë po analizohen, edhe pse një pjesë e zonës së ekspozitës nuk kishte CCTV aktiv, sipas mediave franceze.
Ministrja e Kulturës, Rachida Dati, tha për mediat franceze se “grabitësit vepruan me qetësi dhe profesionalizëm, duke e pasur planin të mirëpërgatitur”. Ajo shtoi se “asnjë person nuk u lëndua dhe stafi veproi sipas protokollit”.
Ndërkohë, presidenti Emmanuel Macron e quajti grabitjen “një sulm ndaj historisë dhe shpirtit francez”, ndërsa politikanë të tjerë e kanë cilësuar “një turp kombëtar” dhe “një dështim alarmues të sigurisë”.
Muzeu i Luvrit mbeti i mbyllur të hënën për hetime, ndërsa vizitorët do të rimbursohen automatikisht. Nuk dihet ende kur do të rihapet, por më herët, institucioni kishte kërkuar fonde për modernizimin e sistemit të sigurisë, si pjesë e projektit “Rilindja e Re” të qeverisë franceze, me kosto deri në 800 milionë euro.
Ekspertët e artit paralajmërojnë se stolitë e vjedhura mund të jenë shkatërruar për t’u shitur në pjesë, pasi shitja e tyre e paprekur është pothuajse e pamundur. “Ka një garë me kohën”, tha Chris Marinello, drejtues i Art Recovery International. “Nëse nuk kapen shpejt, këto vepra të trashëgimisë mund të zhduken përgjithmonë.”/L.F-dritare.net
