Zbulo shëndetin e mushkërive me këtë test të thjeshtë
E Martë 9 Shtator 2025, 22:10
Dritare.net
Burimi: BBC
Studimet tregojnë se funksioni i mushkërive arrin kulmin në fillim të të 20-tave (pak më herët te gratë) dhe më pas fillon të bjerë me kalimin e moshës. Faktorë si pirja e duhanit, ndotja e ajrit dhe sëmundjet si astma e përshpejtojnë këtë rënie. Sa më i mirë të jetë kapaciteti i mushkërive në rini, aq më i mbrojtur është trupi nga sëmundjet kronike më vonë.
Mushkëritë ndikojnë jo vetëm në frymëmarrje, por edhe në imunitet, peshë, presion gjaku, metabolizëm dhe madje në shëndetin e trurit. Humbja e elasticitetit, dobësimi i muskujve respiratorë dhe ngurtësimi i kraharorit me kalimin e viteve çojnë në probleme si vështirësi në frymëmarrje apo sëmundje kronike pulmonare (COPD).
Test i thjeshtë në shtëpi për kapacitetin e mushkërive:
-Mbushni një shishe plastike me ujë duke shënuar çdo 200 ml.
-Kthejeni shishen përmbys në një legen me ujë dhe futni një tub gome në grykë.
-Merrni frymë thellë dhe fryni në tub.
-Numëroni sa nivele uji zbrazni dhe shumëzojini me 200 ml. Ky është kapaciteti jetësor i mushkërive (FVC).
Normalisht është 3–5 litra te të rriturit. Edhe te njerëzit e shëndetshëm, bie rreth 0.2 litra çdo dekadë.
Test tjetër i thjeshtë: Merrni frymë thellë dhe nxirrni ajrin ngadalë duke numëruar sekondat. Duhet të arrini të paktën 11 sekonda.
Edhe pse kapaciteti bie me moshën, mushkëritë e shëndetshme kanë rezervë të mjaftueshme për të siguruar oksigjen gjatë gjithë jetës. Por nëse rënia përshpejtohet, ndikon drejtpërdrejt në cilësinë e jetës dhe rrit rrezikun për sëmundje të zemrës, diabet, osteoporozë dhe probleme të kujtesës.
Si të kujdesemi për mushkëritë: shmangia e duhanit dhe ndotjes, aktiviteti fizik dhe kontrolli mjekësor me spirometri janë hapa thelbësorë për t’i mbajtur ato të forta dhe për të plakur shëndetshëm./K.C/dritare.net
