Stuhia e fuqishme “Byron” godet Greqinë, përmbytje në disa rajone
E Premte 5 Dhjetor 2025, 08:08
Dritare.net
Stuhia “Byron” përfshiu pjesën më të madhe të Greqisë të premten, duke sjellë stuhi të forta dhe përmbytje të shumta. Situata çoi në mbylljen e shumë shkollave, ndërprerje të shërbimeve publike dhe vonesa në transport.
Reshjet intensive prekën zona të shumta, përfshirë Atikën, jugun dhe lindjen e Peloponezit, Kretën, Greqinë Qendrore Lindore, Evian, Sporadet, Thesalinë Lindore, Maqedoninë Qendrore si dhe disa ishuj të Egjeut verior dhe lindor.
Autoritetet greke dërguan disa herë alarme emergjente përmes sistemit 112, duke u kërkuar banorëve të shmangin udhëtimet e panevojshme dhe të qëndrojnë larg bodrumeve dhe kateve të ulëta të ndërtesave. Përmbytje të menjëhershme janë raportuar në zona si Mandra, Alimos dhe Keratsini, ndërsa autostrada Athinë–Korinth u mbyll në segmentin midis Elefsinës dhe Korinthit për shkak të vërshit të ujit.
Shërbimi i Zjarrfikësve njoftoi se nga e enjtja deri në orën 6:00 të mëngjesit të së premtes, qendra e operacioneve mori 331 thirrje për ndihmë në rajonet e Atikës dhe Peloponezit. Shumica e ndërhyrjeve kishin të bënin me nxjerrjen e ujit, heqjen e pemëve të rrëzuara dhe ndihmën për drejtuesit e mjeteve. Rastet më të shumta u regjistruan në Atikën Perëndimore, përfshirë Mandra, Nea Peramos dhe Megara, ndërsa një ditë më parë ekipet ndërhynë edhe në Aspropyrgos, Elefsina, Pire, qendrën e Athinës dhe zonat jugore të kryeqytetit.
Rajoni i Atikës urdhëroi mbylljen e të gjitha shkollave fillore dhe të mesme për ditën e premte. Ndërkohë, Ministria e Brendshme njoftoi se punonjësit e sektorit publik që nuk mund të shkonin në vendin e punës për shkak të kushteve atmosferike do të konsideroheshin në mungesë të arsyeshme, duke u bërë thirrje qytetarëve të lëvizin vetëm nëse kushtet janë të sigurta./L.F-dritare.net
