Ukraina pranë një marrëveshjeje paqeje me Rusinë. SHBA: “Vetëm detaje të vogla” kanë mbetur
E Martë 25 Nëntor 2025, 14:02
Dritare.net
Ukraina ka pranuar një marrëveshje paqeje me Rusinë, sipas një zyrtari amerikan, ndërsa thonë se janë vetëm “detaje të vogla” për t’u sqaruar. Megjithatë, presidenti Volodymyr Zelensky paralajmëron se mbetet ende punë për t’u bërë.
Kjo deklaratë vjen në kuadrin e takimeve që po zhvillohen në Abu Dhabi, ku sekretari i Ushtrisë së SHBA-së ndodhet në bisedime me zyrtarë rusë mbi propozimin e administratës Trump për paqe.
“Ukrainasit kanë pranuar marrëveshjen e paqes. Janë vetëm disa detaje të vogla për t’u zgjidhur, por ata janë dakord me planin,” tha zyrtari amerikan, pa dhënë më shumë hollësi për përmbajtjen e tyre.
Nga ana e saj, Ukraina – që gjithashtu ka një delegacion në Abu Dhabi – e ka pasur qasjen publike me më shumë maturi. Rustem Umerov, sekretari për sigurinë kombëtare i Ukrainës, deklaroi në X (ish-Twitter):
“Delegacionet kanë arritur një kuptim të përbashkët mbi termat kryesorë të marrëveshjes që u diskutuan në Gjenevë. Tani presim mbështetjen e partnerëve tanë evropianë në hapat e mëtejshëm.”
Umerov gjithashtu njoftoi se Ukraina po planifikon një vizitë të Zelenskyt në SHBA për të “kompletuar hapat përfundimtarë dhe për të nënshkruar marrëveshjen me Presidentin Trump.”
Zelensky, në një postim të mëparshëm atë mëngjes, vlerësoi takimet në Gjenevë:
“Pas takimeve në Gjenevë, shohim shumë perspektiva që mund ta bëjnë rrugën drejt paqes reale. Ka rezultate solide, por shumë punë ende pretë,” tha ai.
Nga ana tjetër, Lt. Col. Jeff Tolbert, zëdhënës për Sekretarin Driscoll, tha se bisedimet midis delegacioneve amerikane dhe ruse në Abu Dhabi “po ecin mirë” dhe se SHBA-ja mbetet optimiste.
Ky zhvillim është një nga momentet më të rëndësishëm diplomatike që prej fillimit të luftës, dhe nëse marrëveshja realizohet, mund të shënojë një kthesë historike në konfliktin e gjatë mes Ukrainës dhe Rusisë./L.Fdritare.net
