Rama për protestën: Sharjet dhe kërcënimet nuk janë aktivizëm
Wednesday 17 June 2026, 13:01
Dritare.net
Kryeministri Edi Rama ka reaguar përmes një mesazhi lidhur me protestat e zhvilluara në Tiranë, duke folur për atë që e cilëson si rritje të ekstremizmit dhe presionit ndaj hapësirës demokratike.
Në reagimin e tij, Rama ka përmendur fenomenet e intimidimit, gjuhës së urrejtjes dhe linçimit publik, duke i lidhur ato me mënyrat përmes të cilave, sipas tij, ekstremizmi kërkon ndikim dhe pushtet.
Ai ka publikuar gjithashtu pamje nga protesta në qendër të Tiranës, duke shprehur qëndrimin e tij mbi mënyrën e zhvillimit të saj.
"NJË NGA MËSIMET E VYERA TË HISTORISË është se ekstremizmi e kërkon pushtetin duke filluar me rrugën.
Një grup vendos se ka të drejtë të frikësojë të tjerët për hir të atdheut. Britma zë vendin e argumentit. Lukunizmi zë vendin e dialogut. Intimidimi paraqitet si aktivizëm dhe linçimi publik i tradhëtarëve si drejtësi e Zotit në emër të popullit.
Kështu vepruan lëvizjet ekstremiste në Europën e paraluftës dhe kështu bëjnë edhe sot kur e ku munden, duke e rritur eksponencialisht presionin mbi hapësirën demokratike falë rrugëve pa kontroll të internetit.
Kush nuk mendon si turma bëhet objekt i bullizmit masiv online, i fyerjeve, kërcënimeve, linçimit publik dhe fushatave të organizuara të damkosjes. Qëllimi nuk është debati. Qëllimi është heshtja. Të krijohet një klimë ku njerëzit zgjedhin të heshtin, jo sepse nuk kanë ç’të thonë, por sepse kostoja e të folurit bëhet shumë e lartë.
Historianët bien dakord se terrori i rrugës fillon me akte që duken “të vogla”, me sharje, intimidim, poshtërim publik, marshime e bllokime rrugësh automobilistike dhe sulme të përzgjedhura ndaj individëve, ndërkohë që turma digjitale shumëfishon frikën dhe presionin.
Videoja më poshtë nga qendra e Tiranës mbrëmë flet vetë dhe është një tjetër pasqyrë ku mund të shihet çdokush që sheh qytetari demokratike në fjalorin e kësaj proteste, që nga tribuna e sharjeve, tek koret e linçimeve dhe ulërimat e marshuesve", shkruan Rama në rrjetet sociale./L.F-dritare.net
