Mjekja 74-vjeçare zbulon zakonet që e ndihmojnë të jetojë më gjatë dhe më mirë në pleqëri
E Shtunë 24 Janar 2026, 14:02
Dritare.net
Një mjeke geriatre me mbi 40 vite përvojë në trajtimin e të moshuarve ka ndarë këshillat kryesore që, sipas saj, ndihmojnë për një jetë më të gjatë, më të shëndetshme dhe më kuptimplote në moshë të thyer.
Doktoresha, e cila ka punuar kryesisht me pacientë mbi 80 vjeç, thekson se shëndeti në pleqëri nuk varet vetëm nga treguesit klasikë si tensioni, kolesteroli apo pesha. Në mjekësinë geriatrike, sipas saj, përdoret një qasje më e gjerë e quajtur “5 M-të”: ajo që ka më shumë rëndësi për individin, shëndeti mendor, lëvizshmëria, medikamentet dhe kompleksiteti i jetës.
Ky i fundit përfshin jo vetëm aspektet mjekësore, por edhe faktorët financiarë, socialë dhe emocionalë, të cilët ndikojnë drejtpërdrejt në mirëqenien e të moshuarve.
Sipas mjekes, plakja është një proces tranzicioni dhe mënyra se si njerëzit përshtaten me ndryshimet e jetës ka ndikim të madh në cilësinë e viteve të vona. Ajo ndau disa zakone personale që e ndihmojnë të ndihet më mirë dhe të ruajë vitalitetin.
Ajo nis ditën me ushtrime fizike dhe shtrirje, përfshirë joga dhe palestër disa herë në javë, të cilat i kanë përmirësuar forcën, përqendrimin, ekuilibrin dhe gjumin. Për shëndetin mendor, ajo zgjidh lojëra fjalësh dhe ushtrime të thjeshta për trurin, duke theksuar parimin “përdore ose humbe”.
Kalimi i kohës në natyrë është një tjetër element i rëndësishëm, pasi ndikon pozitivisht në humor dhe gjumë. Po ashtu, ajo thekson rëndësinë e përfshirjes në komunitet përmes vullnetarizmit, mentorimit dhe aktiviteteve sociale, që ndihmojnë në krijimin e lidhjeve domethënëse me njerëz të të gjitha moshave.
Mjekja nënvizon edhe përdorimin e mjeteve ndihmëse, si aparatet e dëgjimit, të cilat sipas saj përmirësojnë ndjeshëm cilësinë e jetës dhe energjinë, pavarësisht paragjykimeve që shoqërojnë plakjen.
Një tjetër mesazh kyç është koncepti i “ndërvarësisë”, ku të moshuarit ruajnë autonominë duke pranuar ndihmën e të tjerëve për të bërë gjërat që u japin kuptim jetës.
Ajo bën thirrje për rezistencë ndaj paragjykimeve për moshën, duke theksuar se studimet tregojnë se njerëzit me një perceptim pozitiv për plakjen jetojnë më gjatë dhe në gjendje më të mirë shëndetësore.
Në fund, mjekja këshillon që progresi i vogël, por i vazhdueshëm, të shihet si sukses. “Gëzohuni për përmirësimet graduale dhe konkurroni vetëm me veten tuaj,” thotë ajo, duke shtuar se asnjëherë nuk është vonë për të provuar gjëra të reja dhe për të përmirësuar cilësinë e jetës./L.F-dritare.net
