Jon Bislimi është një prej atyre zërave të rinj të diasporës shqiptare që po tërheq gjithnjë e më shumë vëmendje në debatet publike mbi identitetin, gjuhën dhe rolin e mërgatës. I lindur në Lion të Francës dhe pjesë e gjeneratës së tretë të emigracionit shqiptar, ai përfaqëson një brez që jeton mes dy botëve, por që ruan fort lidhjen me rrënjët shqiptare.
Në një intervistë në emisionin Shqip nga Rudina Xhunga në Dritare TV, Joni tregoi se është rritur në një familje emigrantësh të angazhuar prej dekadash në çështjen kombëtare shqiptare. Sipas tij, historia e familjes së tij është e lidhur ngushtë me organizimin e diasporës në Francë dhe Zvicër, ku janë ngritur struktura dhe shoqata që kanë shërbyer si urë lidhëse me Shqipërinë dhe Kosovën.
Ai vetë ka lindur në Francë dhe aktualisht studion për drejtësi, ndërsa angazhimi i tij në organizata studentore shqiptare në Lion e ka sjellë shpesh në qendër të debateve publike. Për të, gjuha shqipe dhe identiteti nuk janë thjesht trashëgimi, por përgjegjësi që duhet ruajtur dhe forcuar në çdo brez të diasporës.
Gjatë intervistës, Bislimi u ndal edhe te ndjesia e “idealizmit” që shpesh i atribuohet të rinjve të diasporës. Ai theksoi se idealizmi nuk është dobësi, por një motor ndryshimi shoqëror, duke sjellë si shembull lëvizje historike në Evropë të nisura nga studentët.
Familja e tij është e angazhuar prej dekadash në çështjen shqiptare dhe ka qenë pjesë e organizimeve që kanë kontribuar në ndërkombëtarizimin e çështjes së Kosovës në Evropë. Sot, ai thotë se prindërit e tij po mendojnë rikthimin në Kosovë, si pjesë e një lidhjeje të vazhdueshme me vendlindjen.
Bislimi shprehet se diaspora nuk duhet parë vetëm si burim ekonomik, por si një pjesë aktive e kombit që kërkon përfaqësim, bashkëpunim dhe përfshirje reale në vendimmarrje.
“Nuk jemi thjesht të huaj që kthehen ndonjëherë. Jemi pjesë e një historie që vazhdon,” është një nga mesazhet që la ai në intervistë.
Historia e tij përfaqëson një brez të ri të diasporës shqiptare që kërkon të ruajë identitetin, të ndërtojë ura dhe të marrë pjesë aktive në të ardhmen e Shqipërisë dhe Kosovës./K.C/dritare.net
