Si filtrohet gjaku për dhuruesit? Ja laboratori ku ruhet
E Premte 17 Tetor 2025, 20:08
Dritare.net
Pasi gjaku dhurohet, ai fillon një udhëtim kompleks dhe të teknologjizuar në repartin e përpunimit. Ky është hapi ku një njësi e vetme gjaku transformohet për të shpëtuar deri në tre jetë. Paralelisht me këtë proces, mostrat e gjakut dërgohen në laboratorë të tjerë për testimin e grupit dhe sëmundjeve infektive.
Procesi fillon me centrifugimin. Njësitë e gjakut vendosen në centrifuga të mëdha, të cilat rrotullohen me shpejtësi të lartë për të ndarë gjakun në komponentët e tij bazuar në densitet. Nga ky proces përfitohen tre produkte kryesore:
1.Masa Eritrocitare (Qelizat e Kuqe):Pjesa më e rëndë, që depozitohet në fund. Kjo përdoret për pacientët me anemi ose ata që kanë humbur gjak.
2. Plazma: Lëngu i verdhë që mbetet sipër. Ajo ngrihet menjëherë për të ruajtur faktorët e koagulimit dhe përdoret për pacientë me probleme të mpiksjes së gjakut.
3. Shtresa 'Bafikot' (Buffy Coat): Një shtresë e hollë mes plazmës dhe qelizave të kuqe, e pasur me trombocite dhe qeliza të bardha.
Ndërsa qelizat e kuqe dhe plazma janë gati relativisht shpejt, prodhimi i trombociteve është shumë më i ndërlikuar. Duhen gjashtë njësi 'bafikot' nga gjashtë dhurues të ndryshëm të të njëjtit grup gjaku për të krijuar një dozë të vetme terapeutike trombocitesh. Këto bashkohen, i nënshtrohen një centrifugimi të dytë dhe një procesi inaktivizimi të patogjenëve për të garantuar siguri maksimale.
Trombocitet ruhen në temperaturë ambienti dhe në tundje të vazhdueshme për të parandaluar grumbullimin e tyre, duke qenë gati për pacientët onkohematologjikë dhe ata me çrregullime të mpiksjes./dritare.net
