Flet për herë të parë Artur Shehu: E vërteta për tokën në Zvërnec. Nuk i njoh investitorët
E Premte 5 Qershor 2026, 09:09
Dritare.net
Artur Shehu ka reaguar lidhur me debatin për pronat në Zvërnec dhe projektin e investimit në zonë, duke deklaruar se disponon certifikata pronësie për 253 hektarë tokë dhe se prona e fisit të tij është e padiskutueshme. I ftuar në emisionin “Opinion”, ai tha se nuk ka kontakte të drejtpërdrejta me investitorët, ndërsa për hetimet e SPAK u shpreh se drejtësia po bën punën e saj.
Intervista
Blendi Fevziu: Ju jeni pronar në zonën e Nartës, sa është prona juaj? Sa hektarë?
Artur Shehu: Jam një nga pronarët. Është 460 hektarë, madje kemi pa marrë akoma.
Blendi Fevziu: Cila është forma që keni fituar pronën, e keni blerë, është pronë dhënë nga Komisioni i Kthimit të Pronave, është me 7501?
Artur Shehu: Prona është blerë kohë më parë, pastaj me kthimin e komisionit, me të gjitha format e shtetit, sepse unë kam kohë që kam iku.
Blendi Fevziu: Ju jeni pronar i vjetër në atë zonë apo e keni blerë nga pronarët?
Artur Shehu: Jam pronar i vjetër, madje jam lidhur me një avokat që të prezantoj çdo lloj letre që kam.
Blendi Fevziu: Pra ju jeni pronar i vjetër, por keni shtuar pronën duke ua blerë pronarëve të tjerë?
Artur Shehu: Prona është e fisit Shehu dhe unë jam një nga pronarët, por pjesa më e madhe ka kaluar nga unë, sepse unë jam marrë me ta. Por, prona është e gjithë farefisit. Nuk janë marrë të gjitha pronat.
Blendi Fevziu: Po, sa keni të marra me certifikatë pronësie?
Artur Shehu: 252-253 hektarë. Unë kam pronën time dhe nuk më duhen të tjerat, por dua të shpjegoj një gjë, prona është e padiskutuar. Nuk zihet fare prona në gojë.
Blendi Fevziu: Ju pretendoni për një pronë që u është marrë prej shtetëzimit dhe shpronësimit.
Artur Shehu: Po! Është pronë e vjetër fare!
Blendi Fevziu: Pse SPAK ka bllokuar llogaritë tuaja dhe pretendon që kjo pronë është tjetërsuar në mënyrë ligjore?
Artur Shehu: SPAK ka punën e vetë dhe le ta verifikojë. Nuk kam asnjë gjë me SPAK.
Blendi Fevziu: Keni rënë ju në kontakt me investitorët, apo ka ndërmjetës midis jush dhe investitorëve?
Artur Shehu: Investitorët nuk i njoh fare, ka ndërmjetës. Nuk i njoh fare!/dritare.net
