Rama në ceremoninë prestigjioze në Gjermani: Mario Draghi nderohet me Çmimin “Karli i Madh” 2026!
E Enjte 14 Maj 2026, 15:03
Dritare.net
Kryeministri i Shqipërisë, Edi Rama, mori pjesë në ceremoninë prestigjioze të ndarjes së Çmimit “Charlemagne Prize” në Aachen të Gjermanisë, si pjesë e grupit të miqve të nderit të këtij eventi europian.
Në një postim të publikuar në rrjetet sociale, Rama e cilësoi si “kënaqësi dhe nder” pjesëmarrjen në ceremoninë ku ish-presidenti i Bankës Qendrore Europiane dhe ish-kryeministri italian, Mario Draghi, u vlerësua me Çmimin “Karli i Madh” 2026.
Ky çmim konsiderohet një nga vlerësimet më të rëndësishme europiane për kontributin në bashkimin dhe të ardhmen e Europës. Sipas Ramës, Draghi u nderua për rolin e tij të jashtëzakonshëm në mbrojtjen e stabilitetit ekonomik të Europës dhe për mbështetjen ndaj projektit të një Europe më të bashkuar.
Kryeministri theksoi gjithashtu vizionin e Draghit për një Europë me treg më unik, me aftësi mbrojtëse të vetëmjaftueshme dhe me fuqi prodhuese e konkurruese më të madhe në arenën globale.
